Kryeministri hungarez
Orban del kundër Kosovës dhe fuqishëm pro Serbisë, paralajmëron veto nëse BE përfshin marrëveshjet e Brukselit dhe Ohrit në kornizën e negociatave me Beogradin
Kryeministri hungarez Viktor Orbán tha sot se nëse Këshilli Evropian përfshin marrëveshjet e Brukselit dhe Ohrit në kornizën e negociatave, edhe pse Serbia e kundërshton atë, Beogradi mund të llogarisë gjithmonë te Hungaria.
Këtë ai e ka thënë në një intervistë për Tanjug i pyetur se çfarë do të ndodhë në samitin BE-Ballkani Perëndimor që do të mbahet javën e ardhshme në Bruksel, edhe pse Beogradi është kundër, transmeton Ballkani.info.
“Është një çështje shumë e ndërlikuar dhe Serbia gjithmonë mund të llogarisë në Hungarinë”, tha Orban.
Ai po ashtu tha se situata aktuale në Kosovë është një çështje shumë komplekse dhe se nuk duhet të gjykojë situatën, përveç një fjalie të shkurtër.
“Ajo që kam vënë re në vitet e fundit është se ju serbët përjetoni vazhdimisht provokime. Është një provokim. Dhe mund të reagoni mirë, ose mund të mos jeni në dijeni të provokimit, por cilido qoftë reagimi juaj, mos harroni se pikënisja është provokimi. Ne kemi pakica në shumë vende dhe ne e dimë se si shumica mund të provokojë pakicën. Pra, ne e kuptojmë modelin, si ndodh, në atë territor. Kjo është arsyeja pse ne mbështesim minoritetin serb që jeton atje. Unë jam gati të bëj gjithçka që mundem. Madje ne kemi pësuar disa humbje fizike në përplasjet e fundit mes grupeve lokale. Por pavarësisht, ne jemi ende shumë mbështetës. Kjo është gjëja e parë. Së dyti, mendoj se është mirë që diplomacia juaj insiston në të drejtën ndërkombëtare, sepse e drejta ndërkombëtare është në anën tuaj. Dhe kjo çështje nuk mund të menaxhohet pa pranuar të drejtën ndërkombëtare. Ju nuk mund të injoroni ligjin ndërkombëtar. Kjo është arsyeja pse ju duhet të insistoni në të. Përveç kësaj, mos harroni se janë pesë shtete në Bashkimin Evropian që nuk e kanë pranuar statusin e shtetit të Kosovës. Pra, kjo është një pyetje e hapur. Ne duhet ta negociojmë atë. Sa i përket nëse kemi apo jo një shans për të bërë një marrëveshje, unë nuk jam një profet mjaft i mirë për t’iu përgjigjur kësaj pyetjeje. Por e di që duhet të bëjmë gjithçka që mundemi për të gjetur përfundimisht një zgjidhje”, tha Orban.
I pyetur për marrëdhëniet ndërmjet Serbisë dhe Hungarisë dhe cili ishte faktori vendimtar në pajtimin e dy kombeve pas konflikteve shekullore, Orban shpjegoi se të dy vendet kanë pasur një marrëdhënie vërtet të ndërlikuar gjatë historisë, sepse serbët, siç ai theksoi, se i përkasin oqeanit të madh të popujve sllavë, nuk është e lehtë të kuptojnë hungarezët, të cilët nuk i përkasin shoqërive të bazuara në kulturë as në gjuhën sllave, as gjermane.
Duke folur për zgjerimin e BE-së dhe qëndrimin e vendosur të Hungarisë ndaj anëtarësimit të Ukrainës, Orbán thotë se në Paris, ku po udhëton, do të përpiqet të bindë presidentin francez Emmanuel Macron që të mos mbështesë dhe të mos fillojë negociatat për anëtarësimin në Bashkimin Evropian me Ukrainën, sepse ai beson se ajo lëvizje historike nuk ishte përgatitur siç duhet.
“Përgatitja është mjaft e keqe. Nuk është për shkak të Emmanuel Macron, as për shkak të kryeministrit hungarez, është për shkak të Komisionit. Pra, është e qartë se procesi i anëtarësimit në Bashkimin Evropian është një proces objektiv i bazuar në merita. Nuk është subjektive. Ka piketa të qarta që duhet të arrini. Nëse nuk i arrini ato, nuk mund të vazhdoni në hapin tjetër. Dhe për fat të keq, raporti i Komisionit që thotë se Ukraina ka përmbushur katër nga shtatë kërkesat si parakusht për fillimin e negociatave thjesht nuk është i vërtetë. Është fallco. Ne kemi vendosur shtatë parakushte, tre prej të cilave edhe Komisioni i konsideron të paplotësuara. Katër pjesët e mbetura ishin gjithashtu të falsifikuara. Unë me të vërtetë simpatizoj popullin e Ukrainës,” shpjegoi Orban.
Siç thotë ai, do të dëshironte që Ukraina të afrohej më shumë me Evropën, sepse ai beson se ata kanë një të ardhme evropiane, por është qesharake të thuhet se Ukraina është në gjendje të fillojë negociatat, le të themi, nesër në mëngjes.
“Duhen vite që Ukraina të përgatitet dhe të futet në një pozicion të përshtatshëm për të filluar negociatat. Nuk e kam përmendur as luftën, pasigurinë në territor dhe numrin e njerëzve. Dhe e dyta, nuk kemi pasur kurrë më parë një situatë që dikush që është në luftë, fizikisht në luftë, të nisë negociatat për anëtarësim në Bashkimin Evropian. Cilin territor? Për sa njerëz po flasim?”, tha ai.
Siç thotë ai, propozimi i tij është i ndryshëm dhe nënkupton që së pari një marrëveshje, një kontratë me ukrainasit për të ashtuquajturin partneritet strategjik, për të përcaktuar të gjitha aspektet e tij që do të qartësonin se çfarë do të thotë në aspektin e sigurisë. /Ballkani.info/
