Fotografi nga Vlora| Shqiptarët bëhen bashkë në festën më të rëndësishme të kombit
Përfaqësues të institucioneve të Shqipërisë dhe të Kosovës janë mbledhur në Vlorë për të shënuar 110-vjetorin e Pavarësisë së Shqipërisë.
Aty ku 110 vjet më parë u ngrit flamuri shqiptar, po qëndrojnë krerët e shtetit të Kosovës, presidentja e vendit Vjosa Osmani, kryeparlamentari Glauk Konjufca dhe kryeministri Albin Kurti, të cilët kanë vendosur kurora lulesh pranë varrit të Ismail Qemalit.
Në sheshin e Flamurit ku më 28 nëntor të vitit 1912 u shënua ngjarja më e rëndësishme e kombit shqiptar, sot u ngrit flamuri kuq e zi, ndërsa presidenti i Shqipërisë Bajram Begaj tha se shqiptarët kanë sakrifikuar si asnjë komb tjetër në rajon.
“Përgjegjësitë e Shqipërisë janë edhe më të mëdha se kaq. Ne kemi detyrim për fuqizim të faktorit shqiptar në rajon. Kemi detyrim ndaj vëllezërve shqiptarë në Kosovë, në Maqedoninë e Veriut, në Malin e Zi, Luginën e Preshevës dhe diasporë në përmbushje të detyrimeve kombëtare. Me ata nuk na bashkon vetëm gjuha dhe historia e përbashkët, por edhe aspirata kombëtare e Integrimit Evropian dhe vlerat që ne ndajmë e dëshmojmë për paqen, bashkëjetesën, mirëkuptimin dhe begatinë”, ka thënë presidenti i Shqipërisë.
“Kemi sakrifikuar si asnjë komb tjetër në rajon, por sot Kosova është një shtet i lirë dhe i pavarur, që synon integrimin në BE dhe NATO. Shqipëria mundet dhe duhet të mbështesë fuqizimin e shtetit të Kosovës në çdo drejtim, të jetë zëri i saj sa herë të jetë e nevojshme, bashkudhëtare dhe mbështetëse e palëkundur e rrugëtimit të saj euroatlantik”, ka shtuar Begaj.
Ceremonisë së mbajtur sot në Vlorë i ka paraprirë mbledhja e deputetëve nga Kuvendi i Kosovës dhe ai i Shqipërisë, e zhvilluar dje në Tiranë në shënim të 110- vjetorit të Pavarësisë së Shqipërisë.
Shqiptarët më 28 nëntor shënojnë Festën e Flamurit, përvjetorin e lindjes së komandantit legjendar Adem Jashari si dhe kujtojnë daljen e parë publike të Ushtrisë Çlirimtare të Kosovës.
