Werder Bremen ka njoftuar se Milot Rashica do të mungojë disa javë për shkak të lëndimit të fundit. Me këtë rast, ylli vushtrrias rrezikon seriozisht të mungojë në dy ndeshjet e Kosovës në shtator me Republikën Çeke dhe Anglinë

Milot Rashica e ka marrë një lajm të keq nga stafi mjekësor i Werder Bremenit.

Në fakt, klubi gjerman ka njoftuar sot përmes uebfaqes së vetë zyrtare se ylli kosovar do të mungojë disa javë, duke mos e përcaktuar datën e saktë të rikthimit, për shkak të tërheqjes muskulore që e pësoi në kofshën e këmbës në ndeshjen e fundjavës ndaj Fortuna Dusseldorfit.

“Lajme të këqija për Werder Bremenin. Milot Rashica, i lënduar në ndeshjen me Fortuna Dusseldorfin nuk do të jetë në dispozicion për disa javë, shkaku i tërheqjes muskulore”, ka njoftuar klubi gjerman.

Ky lëndim rrezikon ta lë 23 vjeçarin edhe jashtë Përfaqësueses së Kosovës për dy ndeshjet kualifikuese të Kampionatit Evropian 2020 ndaj Republikës Çeke më 7 shtator dhe ndaj Anglisë më 10 të muajit që vjen.

Pa dyshim, Rashica do të ishte një humbje e madhe për “Dardanët”, pasi dihet se për momentin ai është lojtari më i mirë i Verdhekaltërve.

Gjithashtu, trajneri Bernard Challandes nuk do të mundë të llogarisë në këto dy ndeshje të rëndësishme as në dy yjet tjerë, Arbër Zeneli e Hekuran Kryeziu, të cilët do të mungojnë gjatë.

loading…