Xhaka vazhdon të kërkojë shtëpi në Milano, bisedimet për transferimin e tij i udhëheq njeriu që e transferoi te Arsenali

Granit Xhaka është duke kërkuar shtëpi në Milano, duke qenë se nuk planifikon më të luajë për Arsenalin dhe mendon të transferohet te Rossonerët që në afatin kalimtar të janarit.

Mesfushori shqiptar pritet të largohet nga Emirates Stadium pas reagimit ndaj tifozëve dhe marrjes së shiritit të kapitenit nga klubi.

Ai nuk ka luajtur për Topçinjtë që nga ndeshja ndaj Crystal Palace, kur edhe shpërtheu pas fishkëllimave të tifozëve, ndërsa RSI raporton se 27-vjeçari dëshiron ta finalizojë kalimin te Milani pas vitit të ri.

Ish-shefi ekzekutiv, Ivan Gazidis dhe ish-trajneri i Arsenalit, Arsene Wenger (Foto: Clive Rose/Getty Images/Guliver)

Drejtori ekzekutiv i Rossonerëve, Ivan Gazidis, i cili ka punuar te Arsenali dhe ishte angazhuar pikërisht në transferimin e Xhakës në vitin 2016, do t’i udhëheqë bisedimet për kalimin e shqiptarit te klubi italian.

Në ndërkohë, trajneri i klubit anglez, Unai Emery, ka pranuar se mesfushori (që nuk ka luajtur në katër ndeshjet e fundit) mund të mos luajë kurrë më për Arsenalin.

loading…