Liverpooli ka zbuluar se Fabinho do të jetë jashtë fushës së blertë deri në vitin 2020, pasi që është konfirmuar se braziliani i dëmtoi ligamentet e kyçit të këmbës në ndeshjen kundër Napolit.

Lajmi për lëndimin e Fabinhos është një goditje e madhe për planet e Jurgen Kloppit, pasi që braziliani kishte qenë lojtar kyç në Premierligë për skuadrën që tani e mban kreun e tabelës.

Pasi që tani ekipet po bëhen gati për orarin e ngjeshur të fundvitit në Angli, Liverpooli do të shpresojë të mos i lëndohet asnjë lojtar tjetër, pasi që tashmë është bërë e ditur se Fabinho s’do të luajë më këtë vit.

Ky lëndim bën që 26-vjeçari t’i humbë disa ndeshje të rëndësishme në Premierligë për Liverpoolin, si dhe në rrugëtimin e Kupës së Botës për Klube.

“Liverpooli mund ta konfirmojë se Fabinho pësoi dëmtim në ligamentet e kyçit të këmbës në fundjavë, gjatë takimit të Ligës së Kampionëve me Napolit në mesjavë”, thuhet në deklaratën e lëshuar nga Liverpooli.

“Mesfushori pati nevojë të zëvendësohet pas vetëm 18 minutave lojë në barazimin 1-1 në Anfield, të mërkurën në mbrëmje, pasi u rrëzua në një pozitë të papërshtatshme, pas një ndërhyrjeje”.

“Vlerësimet e mëtutjeshme kanë zbuluar se Fabinho do të jetë jashtë fushës deri në Vitin e Ri. Braziliani do ta fillojë procesin rikuperues me stafin mjekësor të Liverpoolit”.