Kompania "Sallahu"
Ish pronari i kompanisë që fitoi tenderin për Rrugën A ishte dënuar për falsifikim dokumentesh (DOKUMENT)
Zyrtarë të shumtë të Lidhjes Demokratike të Kosovës, përfshirë kreun e saj Lumir Abdixhikun dhe kryetarin e Prishtinës, Perparim Rama, kanë reaguar pasi Gjykata Komerciale ka marrë vendim për pezullimin e punimeve të Rrugës A.
LDK po e konsideron si veprim kryekput politik pasi thonë se vendimin e ka marrë motra e deputetes Fitore Pacolli.
Megjithatë arsyeja që ka çuar deri tek ky vendim i Gjykatës Komerciale duket të jetë fakti që ish-pronari i kompanisë që ka fituar tenderin për ndërtimin e kësaj rruge ka qenë i dënuar nga Gjykata Themelore e Prishtinës për falsifikim dokumentesh.
Në vitin 2018, Gjykata Themelore e Prishtinës kishte dënuar atë botë pronarin e kompanisë Naim Sallahu për falsifikim të dokumentit zyrtar, meqë personi në fjalë kishte dorëzuar një vërtetim të rrejshëm të ATK-së sa i përket obligimeve tatimore dhe se e kishte deklaruar rrejshëm numrin e punëtorëve në një aplikim për tender.
Gjykata Komerciale e Prishtinës ka vendosur që të pezullohet ndërtimi i Rrugës A, pas ankesës që e ka bërë kompania “Pro & CO Group” kundër operatorit ekonomik “Sallahu” i cili e kishte fituar tenderin milionësh.
Ballkani.info e ka siguruar ekskluzivisht vendimin e Gjykatës Komerciale.
Vendimi i nxjerrë më 17 tetor thotë se “Gjykata po ashtu vlerësoi se shtyrja e ekzekutimit të vendimit dhe pezullimi i aktivitetit të prokurimit “Ndërtimi i Rrugës A – Pjesa e parë”, me numër të prokurimit 616-22-7096-5-1-2, iniciuar nga Autoriteti Kontraktues Komuna e Prishtinës, deri në shqyrtimin e pretendimeve të ngritura për shkeljet e pretenduara procedural është më se i dhuru që të ruhet interesi publik”, saktëson vendimi i Komerciales të cilin e ka siguruara Ballkani.info.
Ky vendim ka ardhur pas ankesës që në këtë gjykatë e ka bërë ndërrmarrja “Pro & CO Group” SHPK.
“Kjo pasi Paneli Shqyrtues nuk është marrë fare me pretendimin kryesor të ngritur nga ankuesi që ka të bëjë me shkelje të nenit 65 të LPP-së nga AK, duke e shpërblyer me kontratë Operatorin Ekonomik Sallahu SHPK Drejtori i të cilës është i dënuar për veprën penale Falsifikim i Dokumentit Zyrtar”, thuhet në vendimin e Gjykatës Komerciale.
“Gjyakat vlerëson se shtyrja e eksekutimit të vendimit nuk do t’i sillte dëm të paditurit apo ndonjë personi të interesuar, sepse përkundër shtyrjes se sealizimit të projektit, shtyerja e ekzekutimit të vendimit deri në vlersimin e ligjshmërisë së procedurës së prokurimit do të jetë edhe në dobi të paditurit – kundër propozuesit, sepse do të evitohej çfardo dyshimi për keqpërdorim të fondeve publike nga AK, që potencialisht do të ndikonte negatvisht në besimin e publikut ndaj AK”, thotë vendimi i Gjykatës.
Punimet do të ndërpriten deri në shqyrtimin e pretendimeve të ngritura për shkeljet e pretenduara në procesin e tenderit.
Kontratën e Rrugës A, që peshon 8.5 milionë euro e kishte fituar kompania nga Kaçaniku, “Sallahu SH.P.K“.
Pronari i kësaj kompanie zyrtarisht është Lulzim Sallahu, por mbrapa tij qëndron vëllau u tij, Naimi, që është i dënuar për mashtrim me prokurimin publik. /Ballkani.info/
LEXONI EDHE:
