Uli Hoeness ka thënë se Bayerni mori vendim ta shesh mbrojtësin spanjoll Juan Bernat pas performancës zhgënjyese të tij në ndeshjën ndaj Sevillas në çerekfinale të Champions Leagues në edicionin e kaluar.

Bernat u largua nga Bayerni këtë verë drejt PSG-së, pas 4 viteve të kaluara me bavarezët gjatë të cilave koleksionoi 113 ndeshje.

Presidenti i Bayernit, Uli Hoeness ka zbuluar se shitja e ish mbrojtësit të Valencias u vendos në sfidën përballë Sevillas, ku Bernat u zëvendësua pas 45 minutave të para për shkak të paraqitjes së dobët.

“Kur luajtëm ndaj Sevillas, Bernat ishte pothuajse fajtori i vetëm që rrezikoi të na eliminonte në atë fazë të kompeticionit. Atë ditë vendosëm se duhet ta shesim sepse për pak na kushtoi me eliminim”, u shpreh Hoeness.

Bayerni ia doli ta kalojë Sevillan, por në gjysmëfinale u eliminua nga Real Madridi, të cilët më pas edhe e fituan Champions Leaguen, të 13-tën në histori.