FFK-ja i bën pritje të ngrohtë futbollistit që i tha pa hezitim ‘PO’ Kosovës
Zymer Bytyqi është futbollisti i radhës që ka filluar shkëlqimin në elitën e futbollit turk.
Ylli nga Kosova iu bashkua në janar skuadrës së madhe turke Konyaspor, ku ka filluar të lë gjurmë, pasi tanimë ka shënuar dy gola dhe ka bërë pesë asistime.
Në intervistën e tij të fundit, Bytyqi ka treguar se ka vendosur që të luaj për Kosovën, duke falënderuar edhe Norvegjinë e Shqipërinë për interesimin.
Anësori i skuadrës turke, u prit sot në ambientet e Federatës së Futbollit të Kosovës nga presidenti Agim Ademi dhe sekretari Eroll Salihu.
Krerët e FFK-së e përgëzuan për paraqitjet e tij të mira në Superligën e Turqisë, duke uruar që forma e tij të rritet në vazhdimësi.
Presidenti Ademi e uroi atë për ftesën nga trajneri Bernard Challandes, ku Bytyqi do të luaj në ndeshjet miqësore ndaj San Marinos dhe Maltës.
Kujtojmë se 24-vjeçari ishte grumbulluar më parë për Dardanët në ndeshje miqësore, derisa kishte luajtur edhe për grupmoshat e Norvegjisë.
Së fundmi, Bytyqi është shpallur nga Sofa Score si futbollisti nga Kosova me notën më të lartë nga gjitha kampionatet botërore.
