Gjilani ka shënuar fitore të madhe ndaj Llapit në ndeshjen e xhiros së dhjetë të Superligës së Kosovës në futboll.

Gjilani të shtunën e mposhti Llapin me rikthim të rezultatit, me dy gola të cilat i shënoi në fundin e ndeshjes brenda një minute.

Ardit Tahiri në minutën e 44-t e shënoi golin e epërsisë për Llapin.

Kur ndeshja po shkonte drejt fundit, skuadra e drejtuar nga trajneri Ardian Nuhiu, u kthye fuqishëm.

Blerind Morina dhe Robert Rrahmani shënuan dy gola të shpejtë, në minutën e 84-t dhe të 85-t.

Për Gjilanin ishte fitorja e parë pas barazimit me Dritën dhe humbjes nga Ferizaj, ndërsa Llapi e pësoi humbjen e dytë të njëpasnjëshme. Në xhiron e kaluar, ekipi i udhëhequr nga Tahir Batatina humbi nga Dukagjini.

Gjilani me këtë fitore tani ka 12 pikë në vendin e tetë, ndërsa Llapi mbetet në pozitën e pestë me 14 pikë.

Në anën tjetër Dukagjini i Klinës e ka ndalur në barazim kampionin e tri edicioneve të fundit në Kosovë, Ballkanin.

Dukagjini dhe Ballkani të shtunën në stadiumin “18 Qershori” në Klinë barazuan pa gola.

Ndeshja i ka takuar xhiros së dhjetë.

Nga minuta e 88-të të dyja skuadrat mbetën me nga një futbollist më pak në fushë.

Dardan Morina i Dukagjinit dhe Queven Inacio i Ballkanit, u ndëshkuan me kartonin e dytë të verdhë.

Për Dukagjinin ishte barazimi i parë i edicionit. I ka edhe tri fitore dhe gjashtë humbje, derisa zë vendin e parafundit me 10 pikë.

Ballkani mori barazimin e tretë të edicionit, krahas pesë fitoreve e dy disfatave.

Ballkani aktualisht është i pari në tabelë me 18 pikë, një më shumë se Malisheva që e ka një ndeshje më pak të luajtur, dhe dy më shumë se Prishtina që ka vetëm tetë ndeshje të luajtura.