Pas tre vjetëve, Prokuroria kërkon ekspertizë për vdekjen e 36-vjeçares që dyshohet se iu dha gjak gabimisht
Institucionet e hetuesisë nuk kanë rezultate konkrete edhe tre vjet pas vdekjes se një 36-vjeçareje në Qendrën Klinike Universitare të Kosovës.
Dyshimet e para të shkakut të vdekjes ishin ndryshimi i grupit të gjakut.
Doza e gabuar e grupit të gjakut në shkurtin e vitit 2016 ishte pista e parë që hetuesia pati thënë se po e hulumtonte për zbulimin e arsyeve të vdekjes.
38 muaj pas vdekjes së 36-vjeçares nga Prishtina janë ndërruar tre prokurorë, por ende nuk ka asnjë rrethanë të sqaruar. Dy prokurorë që e kanë trajtuar rastin i kanë intervistuar disa nga punonjësit e QKUK-së.
Këtë e kanë bërë pa kërkuar asnjëherë ekspertizë për rastin e vdekjes së 36-vjeçares.
Siç ka mësuar gazeta, kërkesa për një ekspertizë rreth rastit është bërë vetëm disa javë më parë nga prokurori i tretë që e ka marrë rastin, shkruan sot “Koha Ditore”.
Burimet brenda hetuesisë i kanë thënë gazetës se Prokuroria e Shtetit deri tash nuk ka siguruar asnjë provë të re. Sipas këtij burimi, të vetmin veprim që e ka ndërmarrë hetuesia për më shumë se tre vjet është intervistimi i disa zyrtarëve në QKUK.
