Zemaj bën thirrje për vaksinim dhe respektim të rekomandimeve të IKSHP-së
Deputeti i LDK-së, Armend Zemaj u ka bërë thirrje qytetarëve që të vaksinohen pasi për çdo ditë po thyhen rekorde me raste të reja e viktima.
Zemaj përmes një njoftimi në Facebook u ka shprehur ngushëllime familjarëve për humbjen e më të dashurve të tyre, ndërsa thotë se ky virus nuk po e kursen askënd.
“Rekordi i zi po tejkalohet për çdo ditë. Njëjtë ndodhi edhe sot. Pra, sot edhe më keq: 2.279 raste të reja me Covid-19 dhe 8 të vdekur. Ky është një lajm i keq, i cili na prek të gjithëve pa dallim”.
Zemaj po ashtu ka kërkuar që të respektohet rekomandimet e IKSHP-së në mënyrë që të parandalohet përhapja e virusit.
“U shpreh ngushëllimet më të sinqerta familjarëve për humbjen e më të dashurve të tyre. Lutem për shërim sa më të shpejtë të të gjithë të infektuarve. Njëherit, shpreh admirimin tim të thellë për punën e profesionistëve shëndetësorë, të cilët me tërë qenien e tyre po luftojnë me këtë armik global. Krejt këtë sakrificë po e bëjnë për ne, për familjet tona, për shëndetin dhe jetën tonë. MIRËNJOHJËS përherë!
Të dashur qytetarë, Ky virus i padukshëm dhe i tmerrshëm nuk e kursen askënd. Ai po na sfidon e dëmton shëndetin si dhe po merr jetët e më të dashurve tanë, ndaj:Ju lutem, kurdo që t’iu vijë mundësia e parë VAKSINOHUNI. Uroj që të gjithë t’i respektojmë rekomandimet e Institutit Kombëtar të Shëndetësisë Publike”, shkroi Zemaj.
Ndryshe, në krahasim me dje, numri i rasteve të reja është rritur për 29, ndërsa numri i viktimave është rritur për 4.
Kohëve të fundit në Kosovë, për çdo ditë po thyhet rekord i ri i rasteve të reja
