Xhaka kapiten i Zvicrës, Shaqiri jashtë listës
Përzgjedhësi i Zvicrës, Vladimir Petkoviq, në konferencën e mbajtur për shtyp të premten, ka bërë të ditur se Granit Xhaka do të jetë kapiten i “helvetikëve”.
Shiriti i kapitenit i takon mesfushorit të Arsenalit, pasi nga përfaqësuesja zvicerane është pensionuar Stephan Lichtsteiner, kapiten i deritashëm.
Xhaka 11 herë ka qenë kapiten i Zvicrës, kurse tani do të jetë i rregullt.
Në listën që Petkoviqi e ka publikuar për duelet e Ligës së Kombeve mungon sërish Xherdan Shaqiri. Përzgjedhësi Petkoviq për Shaqirin ka thënë se është i lënduar.
“Kam qenë në kontakt me Xherdanin tërë kohën. Fola me të dhjetë ditë më parë. Ka stërvitur me Liverpoolin dhe është ndier mirë. Të mërkurën donim të diskutonim për hapat e radhës, por fatkeqësisht, ai u dëmtua po të mërkurën. Nuk ishte në gjendje të na ndihmonte. Kjo është arsyeja pse nuk është thirrur”, deklaroi Petkoviqi.
Shqiptari tjetër në listën e Petkoviqit është sulmuesi i Celticut, Albian Ajeti.
