Arsim Kabashi

Tre futbollistë të Ballkanit në Superligën e Turqisë

Tre futbollistë të Ballkanit do të vazhdojnë karrierën në Superligën e Turqisë, ka bërë të ditur kryetari i klubit nga Suhareka, Arsim Kabashi.

Pos Jetmir Topallit që tashmë është zyrtarizuar te skuadra elitare turke Malatyaspor, Kabashi ka konfirmuar se drejt Turqisë do të shkojnë edhe mesufshori ofensiv Blend Baftiu e sulmuesi i krahut Arbër Hoxha. Sipas tij, gjithçka do të mësohet gjatë javës së ardhshme.

“Me dëshirën time këta të tre luanë do i kisha mbajt në Ballkan deri në pension, por duhet t’i përkrahim me të gjitha forcat tona që ëndrrat e tyre mos të mbesin veç ‘ëndërr’ edhe nëse neve ndonjëherë nuk na bie mirë”, ka shkruar ai në Facebook duke mos treguar se në cilat klube do të vazhdojnë karrierën futbollistët kosovarë.

Baftiu 22-vjeçar shkëlqeu në sezonin e fundit me Ballkanin. Ai ishte golashënuesi më i mirë në Superligë me 18 gola në 29 paraqitje, ndërsa Hoxha kishte shtuar gjashtë të tjerë në 24 paraqitje.