Të paktën 40 njerëz u vranë në të shtënat izraelite sot, gjysma e tyre pranë një qendre të shpërndarjes së ndihmave të Fondacionit Humanitar Gaza (GHF), tha Ministria e Shëndetësisë e enklavës bregdetare, ndërsa zyrtarët e Kombeve të Bashkuara dënuan sistemin e ri të shpërndarjes së ushqimit.
Mjekët thanë se të paktën 20 njerëz u vranë dhe 200 të tjerë u plagosën pranë qendrës së shpërndarjes së ndihmave Rafah, të shtënat më të fundit masive në të cilat qindra palestinezë janë vrarë teksa përpiqeshin të merrnin ushqimin që kur Izraeli prezantoi një sistem të ri shpërndarjeje, duke hequr pjesërisht një bllokadë gati tre mujore, transmeton Ballkani.info.
Dëshmitarët thanë se ushtarët izraelitë po hapnin zjarr në një përpjekje për të kontrolluar turmat.
Izraeli ka dorëzuar përgjegjësinë për shpërndarjen e shumicës së ndihmave humanitare që lejon në Gaza tek GHF, një organizatë e re e mbështetur nga SHBA që drejton tre pika kontrolli të ruajtura nga ushtarë izraelitë.
“Ne menduam se do të merrnim ndihmë, por ishte një kurth”
Kombet e Bashkuara e kanë hedhur poshtë një sistem të tillë, duke thënë se shpërndarja e GHF është e pamjaftueshme, e rrezikshme dhe shkel parimet e paanshmërisë humanitare.
Ushtria izraelite nuk komentoi menjëherë raportet për të shtënat. Në incidentet e mëparshme, ajo herë pas here pranonte se ushtarët hapën zjarr pranë qendrave të ndihmës humanitare, por fajësonte militantët për provokimin e dhunës.
Familjarët e viktimave erdhën në spitalin Nasser për të vajtuar të vdekurit e tyre dhe gratë dhe fëmijët qanin pranë trupave të mbështjellë me çarçafë të bardhë. “Ne shkuam atje duke menduar se do të merrnim ndihmë për të ushqyer fëmijët tanë, por doli të ishte një kurth, një vrasje. Unë i këshilloj të gjithëve, mos shkoni atje,” tha Ahmed Fajad, një nga ata që u përpoqën të arrinin ndihmat humanitare.
“Njerëz të shumtë janë vrarë dhe plagosur në ditët e kaluara, duke përfshirë njerëz të uritur që përpiqen të marrin ushqim nga një sistem vdekjeprurës shpërndarjeje,” shkroi Philippe Lazzarini, kreu i Agjencisë Palestineze të Refugjatëve të OKB-së (UNRWA), në një postim në rrjetet sociale.
“Izraeli përdor urinë si armë”
Përpara se sistemi i ri të vihej në fuqi, ndihma për 2.3 milionë banorët e Gazës u shpërnda kryesisht nga agjencitë e OKB-së si UNRWA, e cila punëson mijëra staf në Gaza dhe menaxhon qindra zona në të gjithë enklavën. Izraeli tha se duhej të merrte kontrollin e shpërndarjes sepse luftëtarët e Hamasit po devijonin ushqimin. Militantët e mohojnë këtë dhe pretendojnë se Izraeli po përdor urinë si armë.
Lazzarini tha se Izraeli nuk i ka hequr kufizimet ndaj agjencive të OKB-së, përfshirë UNRWA-n, pavarësisht nga sasia e madhe e gatshme për të hyrë në enklavë. Agjencia ushtarake izraelite që koordinon ndihmën (COGAT) njoftoi dje se kishte lejuar 292 kamionë që transportonin ndihma humanitare nga Kombet e Bashkuara dhe komuniteti ndërkombëtar, përfshirë ushqime dhe miell, të hynin në Gaza këtë javë.
Ai tha se ushtria izraelite do të vazhdojë të lejojë hyrjen e ndihmave humanitare duke siguruar që ato të mos arrijnë në Hamas. Para incidentit të sotëm, Ministria e Shëndetësisë në Gaza e drejtuar nga Hamasi tha se të paktën 300 njerëz ishin vrarë pranë qendrave të shpërndarjes së ndihmave dhe më shumë se 2600 u plagosën që kur GHF filloi të funksiononte. /Ballkani.info/







