Abelard Tahiri

Tahiri: Të zbardhen shkaqet e zjarrit, Qeveria vazhdimisht u përpoq ta degradojë imazhin e IML-së

Shefi i Grupit Parlamentar të Partisë Demokratike të Kosovës (PDK), Abelard Tahiri, ka reaguar në lidhje me zjarrin që ka ndodhur në Institutin e Mjekësisë Ligjore (IML) në mëngjesin e së martës.

Tahiri ka theksuar se rasti është tepër shqetësuese dhe se duhet zbardhur sa më parë.

Po ashtu, ka kritikuar Ministrinë e Drejtësisë, duke përmendur zhdukjen e mostrave të Astrit Deharit dhe dështimin sipas tij, për të shtuar kapacitetet e mbrojtjes dhe sigurisë së IML-së.

Ai gjithashtu ka thënë se “sulmet dhe fyerjet e udhëheqësve të Ministrisë së Drejtësisë” ndaj ekspertëve mjeko-ligjor, kanë cenuar besimin e publikut në IML.

“Pas skandalit të zhdukjes së mostrave të Astrit Deharit, dështimit për të shtuar kapacitetet e mbrojtjes dhe të sigurisë së IML-së, sulmeve dhe fyerjeve të udhëheqësve të Ministrisë së Drejtësisë ndaj ekspertëve mjeko-ligjor, ka cenuar thellë edhe besimin e publikut në punën e këtij institucioni, i cili si i tillë, është në vartësi të drejtpërdrejtë menaxheriale të Ministrisë së Drejtësisë”, ka shkruar Tahiri në Facebook.

Tahiri ka deklaruar se Qeveria po bën përpjekje të vazhdueshme për të degraduar punën dhe imazhin e IML-së dhe se kjo kërkon një trajtim urgjent nga ana e Kuvendit të Republikës së Kosovës.