Tahiri: Prokurorët e Hagës sot do të duhej të zbarkonin në Serbi, ku po nxjerren eshtra të shqiptarëve
Deputeti i PDK-së, Abelard Tahiri në seancën e Kuvendit në seancën e sotme plenare në interpelancë me kryeministrin Avdullah Hoti ka thënë se Kosova nuk po i shfrytëzon aleatët për të zgjidhur çështjen e të pagjeturve.
Ai ka thënë se prokurorët e Gjykatës Speciale do të duhej të ishin në Serbi ku po ndodh zhvarrimi i trupave që dyshohet të jenë qytetar të Kosovës.
“Është një çështje jashtëzakonisht e rëndësishme – nuk po i shfrytëzojmë aleatët. Po e shohim një abuzim të Qeverisë me moslëvizjen dhe mosndërmarrjen e hapave konkret. Ne e dimë se Qeveria e Kosovë nuk mund ta detyrojë Serbinë të bashkëpunojnë në këtë drejtim, por mund ta bëjnë shtetet si Gjermania”, ka thënë Tahiri.
Sipas tij, nëse ne nuk ndërmarrin asnjë hap, normalisht se ndërkombëtarët nuk do të interesohen për çështjen e të pagjeturve.
“Jemi dëshmitar se gjatë kësaj periudhe po ndodhë zhvarrimi që po dyshohet se janë qytetar të Kosovës në Serbi. Do të duhej që në vendngjarje të ishin prokurorë të Prokurorisë Speciale. Ata do të duhej të ishin sot në Serbi dhe t’i hetojnë këta trupa sepse sot ka dëshmi dhe fakte për krimet që janë kryer. Lë të na dëshmojnë se kjo nuk është gjykatë një etnike. Ne kemi nevojë për angazhimin e Shteteve të Bashkuara të Amerikës. Nëse ne nuk ndërmarrin asnjë hap, normalisht se ata nuk do të interesohen për çështjen e të pagjeturve”, ka deklaruar Tahiri.
