Belgjikë
Sulmuesi që vrau dy suedezë është ende në arrati, ishte duke qëndruar ilegalisht në Belgjikë
I dyshuari për të shtënat vdekjeprurëse në Bruksel është një 45-vjeçar tunizian, i cili kërkoi azil në Belgjikë në nëntor 2019. Sipas informacioneve nga autoritetet belge, ai me shumë gjasa jeton në atë vend që nga viti 2016.
Burri doli në radarin e shërbimeve të policisë kur në vitin 2016 një shërbim i huaj i policisë e klasifikoi si të radikalizuar dhe raportoi se donte të shkonte në një “zonë konflikti xhihadist”.
Asgjë konkrete nuk u bë me atë informacion sepse kishte shumë raporte të tilla në atë kohë, sipas ministrit belg të Drejtësisë Vincent Van Quickenborne.
Personi është i njohur në polici për aktivitete të dyshimta, kontrabandë me njerëz, qëndrim të paligjshëm dhe shkelje të sigurisë së shtetit. Burri dyshohet se u dënua në Tunizi për një shkelje të ligjit të zakonshëm dhe jo për terrorizëm, siç u raportua më parë nga media të ndryshme.
Kryeministri Alexander De Croo njoftoi në konferencën e sotme për shtyp se i dyshuari është ende në arrati. Ai e karakterizoi sulmin si “çmenduri terroriste”.
Nga detajet e njohura të sulmit në Bruksel, ai trajtohet si terrorizëm
Ai shprehu ngushëllimet e tij për familjet e viktimave dhe theksoi se kërkimet për autorin janë në kulm. Ai konfirmoi se niveli i alarmit në Bruksel është ngritur në nivelin më të lartë (4), dhe në pjesën tjetër të vendit në nivelin 3.
Dy persona u vranë para ndeshjes mes Belgjikës dhe Suedisë dhe supozohet se ishin tifozë të Suedisë në Bruksel.