Sindikata e Policisë së Kosovës ka dënuar aktet e dhunës, hedhjen e mjeteve piroteknike dhe mjeteve të forta ndaj zyrtarëve policorë gjatë protestave të fundit në Prishtinë.
Në një komunikatë për media të publikuar të martën, Sindikata ka theksuar se e drejta për protestë, shprehje të lirë dhe tubim paqësor është e drejtë themelore dhe duhet të respektohet e garantohet.
Megjithatë, sipas SPK-së, kjo e drejtë nuk duhet të shndërrohet në dhunë ndaj policëve, institucioneve apo qytetarëve të tjerë.
“Policët e Kosovës nuk janë palë në asnjë debat politik. Ata janë profesionistë të uniformuar, të cilët në këto rrethana kanë për detyrë të zbatojnë ligjin dhe të garantojnë sigurinë e të gjithëve”, thuhet në reagim.







