Shumë çerdhe private rrezikojnë të falimentojnë, kërkojnë që sa më shpejtë të nisin punën

Asociacioni i institucioneve parashkollore private paralajmëron falimentim të këtyre bizneseve nëse vazhdojnë të qëndrojnë të mbyllura.

Ndonëse njoftuan se sot do i hapnin dyert për fëmijët, institucionet parashkollore në kryeqytet vazhdojnë të jenë të mbyllura deri në hartimin e një protokolli që do të konkretizonte deri në detaje menaxhimin e situatës pas rihapjes së çerdheve. Kështu njoftoi mbrëmë kryetari i Prishtinës, Shpend Ahmeti.

Por me këtë nuk po pajtohen pronarët e çerdheve private.

Gëzime Rexhepi-Çollaku nga Asociacioni i institucioneve parashkollore private thotë se humbjet e mëdha që iu ka shkaktuar pandemia do bëjnë që edhe shumë çerdhe private të falimentojnë.

Sipas saj, ky komunitet i bizneseve nuk u ndihmua nga askush përkundër nevojave të mëdha.

“Kjo humbje është e vështirë të kalkulohet kur shumë prej çerdheve kanë filluar edhe falimentimin e tyre dhe disa prej tyre nuk do të hapen fare, kjo goditja e dytë ishte për mos t’u ngritur në këmbë më. Duke e ditur komuna se sa i kushton një çerdhe publike dhe një çerdhe me partneritet publiko-privat, dhe një çerdhe në bazë me komunitet ne jemi një kontribut i madh për shtetin. Mirëpo, asnjëherë dhe asnjë mënyrë nuk jemi kontaktuar dhe ndihmuar me asnjë formë, frika është që mos të hapemi më… Mundësia e falimentimit është shumë e madhe përveç që është dëm për ne është edhe dëm për prindërit, por edhe për fëmijët”, thotë ajo.

Duke folur rreth vendimit të komunës së PrishtinësRexhepi-Çollaku thotë se institucionet parashkollore private janë në kompetencë të Ministrisë së Arsimit dhe jo të komunës.

Sipas saj, deri tani nuk kanë ndonjë informatë se kur do të mund t’i hapin bizneset e tyre.

“Meqenëse sot iu kemi shkruar email komunës, direkt zyrës së kryetarit të komunës edhe përmes telefonit jam dëgjuar me Miranda Mullafazliu (zëdhënëse e Komunës së Prishtinës)… Deri në këto kohë nuk kemi asnjë informatë…. Çdo herë kemi qenë në kompetencë të Ministrisë së Arsimit derisa ne licencohemi nga MASHT dhe asnjëherë dhe në asnjë mënyrë nuk kemi qenë në kompetencë të komunës, nuk e kemi idenë dhe në çfarë mënyrë dhe ku është arsyeja se pse u hodhëm në kompetencë të të komunës nuk e di arsyem as pse ndodhi dhe çka do bëhet”, tha ajo.

Institucionet parashkollore nuk janë hapur sot as në Komunën e Fushë-Kosovës.

E në këtë komunë thonë se i vetmi institucion parashkollor publik të cilin e ka kjo komunë nuk do të hapet deri më 1 shtator, ndërsa për ato private thotë se nuk i kanë në kompetencë.

Kështu ka njoftuar për KosovaPress zëdhënësi i Fushë-Kosovës, Ali Topalli i cili tha deri tek ky vendim kanë ardhur edhe për shkak të shtimit të numrit të rasteve me Covid-19.

“Në rrethana normal nga 1 gushti edhe kjo çerdhe është dashur që të jetë në pushimin e merituar veror, sido që të jetë punëtorët e kësaj qendre e këtij kopshti kanë vazhduar që të punojnë dhe të jenë në kontakte të përhershme me Drejtorinë komunale të Arsimit, me prindërit dhe si rezultat i vendimit të qeverisë për hapjen e kopshteve është arritur një marrëveshje dhe konsensus i përbashkët që ky kopsht nuk do të hapet së paku para datës 1 shtator… Si institucion dhe si komunë nuk jemi kompetencë për institucionet private për çerdhet sepse ato janë kompetencë e ministrisë dhe institucioneve që i kanë licencuar ato dhe nuk është në autoritetin tonë por që është që është çështje direkte e tyre dhe veprojnë në bazë të rregullimit të tyre të brendshëm”, thotë ai.

E shumë çerdhe private që funksionojnë në komunën e Fushë-Kosovës përmes njoftimeve në rrjetin social Facebook thonë se janë në pritje të Komunës së Fushë-Kosovës.