Ish-komandanti i UÇK-së, Shukri Buja, ka reaguar përmes një postimi publik lidhur me zhvillimet në Dhomat e Specializuara, duke shprehur qëndrimin e tij kritik ndaj kësaj gjykate dhe ndaj, siç thotë ai, ndryshimit të qëndrimeve nga disa figura publike dhe politike.

Në reagimin e tij, Buja thekson se prej kohësh e ka kundërshtuar ligjin për Dhomat e Specializuara, duke e cilësuar atë si të njëanshëm, politik dhe të dëmshëm për Kosovën. Ai rikujton se kishte dalë kundër këtij ligji në kohën kur ishte votuar nga deputetët e Kuvendit të Kosovës.

“Sot, çuditërisht, shumëkush ka ndryshuar”, shkruan Buja, duke aluduar se disa nga ata që më herët, sipas tij, i etiketonin ish-luftëtarët si kriminelë dhe kërkonin hetime e burgosje, tani flasin për mbrojtjen e luftës çlirimtare.

Ai citon edhe veprimtarin Adem Demaçi, duke përmendur thënien: “Është mirë që njerëzit të ndryshojnë edhe një minutë para orës 12.” Megjithatë, Buja shpreh dyshimin e tij për qëndrueshmërinë e këtyre ndryshimeve, duke shtuar se “ata që ndryshojnë një minutë para orës 12, ndryshojnë edhe një minutë pas saj”.

Në fund të reagimit, Buja thekson se nuk e ka ndryshuar qëndrimin e tij ndër vite dhe se do të vazhdojë të flasë. “Lufta çlirimtare ishte e drejtë. Liri për të gjithë çlirimtarët tanë!”, përfundon ai.

Reagimi i tij vjen në një kohë kur proceset në Dhomat e Specializuara vazhdojnë të jenë temë e debatit publik dhe politik në Kosovë.