Sulmuesi kosovar, Fisnik Asllani, ka shkëlqyer të shtunën pasdite në ndeshjen hapëse të edicionit 2025/26 në Bundesligën gjermane. 

Asllani ishte më meritori në fitoren e skuadrës së Hoffenheimit duke realizuar një gol dhe regjistruar një asistim.   

Hoffenheimi në kuadër të xhiros së parë në udhëtim fitoi 2:1 ndaj Bayer Leverkusenit.

Fillimisht Asllani i barazoi shifrat në minutën e 25-të. Ai shënoi me gjuajtje të fuqishme me të majtën.

Për Reprezentuesin e Kosovës ishte goli i parë në elitën e futbollit gjerman.

23-vjeçari më pas në minutën e 52-të asistoi te goli i epërsisë 2:1 të cilin e realizoi Tim Lemperle. 

Qendërsulmuesi i talentuar e kompletoi ndeshjen dhe ishte më i dalluari. Ndeshjen te Hoffenheimi e kompletoi edhe mesfushori Leon Avdullahu.

Golin e vetëm për Leverkusenin e realizoi Jarell Quansah në minutën e gjashtë.