Përballja me Interin

Romagnoli synon të bëjë krenar Gattuson me fitore në derbi

Alessio Romagnoli ka lavdëruar trajnerin Gennaro Gattuso për raportet që mban me futbollistët, në prag të “Derby della Madoninna”.

Kapiteni i Milanit, Alessio Romagnoli është i motivuar t’i japë fitoren trajnerit Gattuso në derbin ndaj Interit.

Mbrojtësi i kombëtares italiane këtë sezon ka startuar në 6 prej 7 ndeshjeve të “rosonerëve” në Serie A, teksa në fillim të sezonit e mori shiritin e kapitenit nga Leonardo Bonucci i cili u rikthye te Juventusi.

Milani është rikthyer te fitoret pas 3 ndeshjeve të përfunduara në barazim që edhe shtuan pikëpyetjet për stolin e Gattusos, por Romagnoli është i gatshëm të japë maksimumin në mënyrë që trajneri italian të konfirmohet.

“Ne i qëndrojmë afër trajnerit. Ai na dhurojë shumë gjëra sezonin e kaluar kur erdhi, kështu që ne do të tentojmë të bëjmë gjithçka për ta bërë krenar Gattuson. Trajneri ynë e di forcën tonë dhe gjithmonë mundohet të nxjerrë më të mirën nga ne”, tha Romagnoli.

Dy skuadrat e Milanos ndahen nga katër pikë, me “nerazzurrët” që gjenden në pozitën e tretë por me një ndeshje më shumë se Milani.

Romagnoli e di rëndësinë e kësaj ndeshjeje, ndërsa pretendon se Interin e kanë rival për një vend që dërgon në Champions League.