Roma merr fitore të madhe në Holandë, Dinamo e Kastratit mposhtet në Zagreb
Roma e ka fituar ndeshjen e parë çerekfinale të Ligës së Evropës. Të enjten, të drejtuarit e Paulo Fonsecas mposhtën Ajaxin e Erik Ten Hag me rezultatin 2:1.
Gjiganti holandez, Ajaxi, kaloi i pari në avantazh në stadiumin “Johan Cruijff Arena”. Davy Klaassen shënoi në minutën e 39-të.
Megjithatë, Roma u kthye në lojë në pjesën e dytë. Rezultatin e barazoi i talentuari Lorenzo Pellegrini, që shënoi nga gjuajtja e lirë, por me një gabim të portierit holandez, Kjell Scherpen.
Ishte mbrojtësi Ibanez ai i cili vulosi rezultatin final të takimit. Mbrojtësi i Romës shënoi për mrekulli tre minuta para fundit.
Dueli kthyes që luhet pas një jave, do ta përcaktojë gjysmëfinalistin e këtij takimi.
Te Roma mungoi Marash Kumbulla, që është i dëmtuar në gju.
Ademi e Kastrati mposhten nga Villarreali
Arijan Ademi ka kompletuar ndeshjen, ndërkohë që Lirim Kastrati është aktivizuar në pjesën e dytë, të enjten mbrëma. Skuadra e tyre, Dinamo Zagreb, ka pësuar 1:0 në shtëpi nga Villarreali.
Ishte kjo ndeshja e parë e çerekfinales së Ligës së Evropës. Gerard Moreno ka shënuar golin e fitores në minutën e 44-t. Ajo u akordua për lojë me dorë në zonë nga një mbrojtës i skuadrës kroate.
Reprezentuesi i Kosovës, Kastrati, u aktivizua në minutën e 61-të në vend të Kristijan Jakiqit. Por sulmuesi i krahut nuk mundi të bëjë dallimin.
Ndeshja e kthimit është më 15 prill në Villarreal.
