Reagimi i VV-së: Astriti u vra vetëm pse ishte aktivisti yni, hetimet e pavarura të fillojnë sa më shpejt

Lëvizja Vetëvendosje ka reaguar pas publikimit të raportit nga ana e Institutit Zvicran. Nga LVV deklarojnë se Astrit Dehari është vrarë për shkak se ka qenë aktivist i Lëvizjes Vetëvendosje.

“Këtë e ka thënë edhe raporti i ekspertëve të mjekësisë ligjore nga Shqipëria e Mbretëria e Bashkuar, këtë e thotë tani edhe raporti i ekspertëve të Qendrës Universitare Romande për Mjekësi Ligjore (CURML) në Lozanë të Zvicrës, këtë e ka thënë vetë trupi i Astrit Deharit”, thuhet në reagimin e Vetëvendosjes.

Nga partia e Albin Kurtit janë shprehur se prokuroria e ka obligim ligjor dhe njerëzor që t’i fillojë hetimet për rastin, në mënyrë që përgjegjësit e këtij krimi monstruoz, që e privoi aktivistin 26 vjeçar Astrit Deharin nga jeta, të vihen të gjithë para drejtësisë.

“…në mënyrë që përgjegjësit e këtij krimi monstruoz, që e privoi aktivistin 26 vjeçar Astrit Deharin nga jeta, të vihen të gjithë para drejtësisë. Drejtësia nuk duhet të ndalet para fajtorëve, sado lart që mund të ndodhen ata në hierarkinë e pushtetit. Po ashtu, duhen hetuar edhe ata që përkundër dhimbjes së familjes, shokëve dhe mbarë opinionit publik, u bënë mjet i dezinformimit menjëherë pas vrasjes së Astritit në burg. Cili ishte qëllimi i atyre që me çdo mjet, edhe duke gënjyer e duke i ndërruar fjalët, donin ta mbulonin krimin si vetëvrasje”, thuhet tutje në reagim.

Ata deklarojnë që fillimin e hetimeve duhet ta kërkojnë edhe prindërit e Astrit Deharit, Xhemile Dehari, Arta Boshtraj Dehari dhe Avni Dehari së bashku me avokatin Tomë Gashi.

“Lëvizja VETËVENDOSJE! poashtu kërkon që hetimet të fillojnë sa më parë, të pavarura, të drejta dhe profesionale. Qytetarët e Republikës së Kosovës, e gjithë shoqëria dhe shqiptarët kudo që ndodhen nuk janë të qetë deri sa të vihet drejtësia për Astritin.”.