Trajneri i Dritës

Ramadani para ndeshjes me Dukagjinin: Në Kupë nuk ka favorit, shpresoj në kualifikim

Nesër e mërkure Dritën e pret ndeshja e Kupës së Kosovës, në 1/4 e kësaj gare ku ballafaqohet me Dukagjini nga Klina.

Skuadra gjilanase mbajti konferencë për media, ku para gazetarëve folën trajneri Zekirija Ramadani dhe kapiteni Rron Broja.

Trajneri Ramadani thekson se nesër është ndeshje e vështirë dhe në ndeshje të Kupës nuk ka favorit.

“Në këtë kompeticion për Kupë ndodhin befasi, por nuk  do të ishte befasi nëse eliminohemi nga Dukagjini. KF Dukagjini ka ekip të mirë, ka trajner cilësor, ka konkurrencë brenda grupit, por ne shohim punën tonë dhe objektivi jonë është të vazhdojmë për dy trofetë përderisa na mundëson gara. Kemi një lloj reflektimi në stërvitje pas ndeshjes së fundit dhe ajo më jep besim që ekipi do të jetë siç ishte pas humbjes ndaj Llapit. Çdo humbje është e vështirë, jena mërzit por kur pas 3 ditësh kemi ndeshje me peshë edhe për ne si trajnerë është më lehtë për ta rikthye ekipën”,  thekson Zekirija Ramadani.

Ndërsa, në lojë agresive, seriozitet dhe kualifikim shpreson edhe kapiteni, Rron Broja.

“Nesër na pret një ndeshje kundër një kundërshtari të vështirë, siç është KF Dukagjini. Jemi mobilizuar mjaft këto ditë në stërvitje që nesër t’i qasemi ndeshjes me maksimumin tonë, të tregohemi agresiv dhe të kalojmë në gjysmëfinale që është edhe synimi jonë. Dhe besoj që me shumë punë të arrijmë të kualifikohemi nesër”, ka thënë kapiteni Broja.

Trajneri Ramadani tha se beson në futbollistët e tij dhe në kualifikimin në gjysmëfinale.

“Në Kupë nuk ka favorit, kam besimin e plotë te futbollistët, do jetë ndryshe, do të jetë një lojë agresive, do të ketë luftë sportive dhe shpresoj që ne të kualifikohemi për në gjysmëfinale”, përfundoi Ramadani.

Ndeshja e 1/4 e Kupës së Kosovës mes KF Dukagjini – FC Drita zhvillohet nesër nga ora 13.00 në Stadiumin “18 Qershori” në Klinë.