Nënkryetarja e Prishtinës, Donjeta Sahatçiu, është takuar me përfaqësues të operatorëve privatë, që ofrojnë shërbim të transportit me autobusë në linjat qendrore dhe periferike, përfaqësues të Trafikut Urban në Prishtinë dhe partnerët nga BERZh, për të prezantuar dhe diskutuar planin e veprimit për reformimin e transportit publik.

Sahatçiu përmes një postimi në rrjetin social “Facebook”, ka njoftuar se në vitin e ardhshëm do të ketë reforma në transportin publik në kryeqytet.

Sipas saj, mbështetja e të gjithë operatorëve është e domosdoshme për reformë të mirëfilltë.

Flotë e re (31) nga kredia me BERZh, linja të reja dhe ridizajnim të linjave ekzistuese, stacione dhe mini stacione të reja, bileta të integruara, pagesë me SMS dhe QR code, sistem i avancuar i menaxhimit të trafikut, rregullore e re për transport publik si dhe çmime të reja, janë disa nga reformat që, sipas Sahatçiut, do të bëhen në vitin 2023 në transportin publik në Prishtinë.

Postimi i plotë i Sahatçit, pa ndërhyrje:

2023 është vit i reformave në transportin publik në Prishtinë! 🚍🚏🚦

Me ekipin shembullor të sektorit të mobilitetit nga Drejtoria e Shërbimeve Publike takuam përfaqësues të operatorëve privat që ofrojnë shërbimin e transportit me autobusë në linjat qëndrore dhe periferike, përfaqësues të Trafiku Urban Prishtinë dhe partnerët nga BERZh për të prezantuar dhe diskutuar planin e veprimit për reformimin e transportit publik.

Operatorët privat po funksionojnë tash e 10 vite pa licensë në kushte të pa favorshme derisa mbulojnë shumicën e linjave në Kryeqytet. Në anën tjetër, kemi qytetarë që ankohen për shërbim dhe mungesë të orareve në linja ku kërkesa është rritë ndjeshëm.

Ky është rezultati i angazhimit disa mujor. Jemi në rrugë të mirë, e mbështetja e të gjithë operatorëve është e domosdoshme për reformë të mirëfilltë.

🚍 Flotë e re (31) nga kredia me BERZh

🏁 Linja të reja dhe ridizajnim të linjave ekzistuese

📍Stacione dhe mini stacione të reja

📲 Biletë e integruar, pagesë me SMS dhe QR code

🚦 Sistem i avansuar i menaxhimit të trafikut

📑 Rregullore e re për transport publik

🏷️ Çmimore e re

Bashkë, edhe e ndreqim. 💙