Polonia ka nisur një operacion kërkimi për elementët e një rakete të dyshuar ruse e cila u tha se kishte shkelur hapësirën ajrore të vendit të premten në mëngjes.

“Ne informojmë se më 30 dhjetor do të kryhet një kërkim tokësor në Voivodeshipin e Lublinit për elementë të mundshëm të objektit që shkeli hapësirën ajrore polake dje”, shkroi komanda operacionale e ushtrisë polake në platformën e mediave sociale X.

Ushtria polake tha se qëllimi i kërkimit është të konfirmojë përfundimisht se asnjë element i objektit nuk ka mbetur në territorin polak.

Zyrtarët ushtarakë polakë thanë të premten se objekti ishte larguar nga hapësira ajrore e vendit brenda tre minutave pas hyrjes nga drejtimi i kufirit me Ukrainën.

“Pala ukrainase dhe aleatët fillimisht kanë konfirmuar të dhënat tona të radarit se objekti ishte larguar nga territori polak”, tha një zëdhënës i komandës operacionale për Reuters.

Kërkimi është planifikuar të vazhdon deri në orën 19:00, pasi u ndalua gjatë natës, shtoi ai.

Rreth 480 ushtarë të Forcave të Mbrojtjes Territoriale do të merrnin pjesë në kërkimin pranë qytetit Zamosc në Poloninë juglindore.

Të premten në mbrëmje, Ministria e Jashtme e Polonisë thirri të ngarkuarin me punë të Rusisë, duke kërkuar një shpjegim për shkeljen e hapësirës ajrore të saj nga një raketë e drejtuar.

VIDEO BONUS: Vazhdon shtrirja e sovranitetit të Kosovës në veri