Presidenti Hashim Thaçi përmes një postimi në Twitter, ka shkruar se Bashkimi Evropian duhet t’i japë peshë politike përfshirjes së vet në dialogun Kosovë-Serbi.
“Duke ulur nivelin dhe përgjegjësinë në një emisar pa kredibilitet nuk i ndihmon këtij qëllimi. BE’ja duhet t’i përkrahë të gjitha përpjekjet që çojnë kah arritja e marrëveshjes historike dhe të punojë me partnerë që japin rezultate”, ka shkruar Thaçi, raporton Ballkani.info.

Kjo kritikë e Thaçit vije pasi që BE-ja ka paralajmëruar emërimin e Mirosllav Lajçakut si emisar në dialogun Kosovë-Serbi.
Megjithatë, duket se Thaçi dhe ish partia e tij, PDK për herë të parë nuk janë në të njëjtat valë politike.
Të paktën sa i përket emërimit të Lajçakut, shkruan Ballkani.info.
Ka qenë nënkryetari i parë i PDK-së, Enver Hoxhaj ai që e kishte mirëpritur propozimin e mundshëm të BE-së që ish ministri sllovak të caktohet i dërguar special i BE-së në dialogun Kosovë-Serbi.

“Mirëpres vendimin e mundshëm që Mirosllav Lajçka të jetë i dërguar për dialogun Kosovë-Serbi dhe Ballkanin Perëndimor. Ai e ka mbështetur Kosovën dhe Ballkanin për dekada dhe ka njohuri për secilin shtet dhe për rajonin. Ai është zgjidhje e mirë edhe për BE-në edhe për Ballkanin Perëndimor”, ka shkruar Hoxhaj vetëm tri ditë më parë.
Lajçak, ish ministër i Punëve të Jashtme të Sllovakisë, shtet ky që nuk e ka njohur Kosovën, shihet si jo kredibil për ta kryer këtë funksion. /Ballkani.info/







