Parlamenti Evropian do të votojë për Rezolutën për marrëdhëniet ndërmjet Serbisë dhe Kosovës dhe incidentet në fshatin Banjskë në seancën e dytë të tetorit të Parlamentit të BE-së të enjten, më 19 tetor në mesditë, njoftoi Parlamenti Evropian.
Siç mëson N1, prezantimi i projekt-rezolutës, që është në fazën e përgatitjes, dhe negociatat e para të grupeve politike për tekstin përfundimtar do të zhvillohen mbrëmjen e së hënës në Strasburg, në margjinat e seancës plenare të Parlamentit të BE-së, transmeton Ballkani.info.
Rezoluta është iniciuar nga grupi politik i socialdemokratëve në PE, pasi mendojnë se situata në Kosovë është “jashtëzakonisht shqetësuese”.
“Sulmi i fundit terrorist ndaj policëve të Kosovës, i cili u krye nga një bandë e armatosur serbe, duhet të ketë pasoja politike,” tha deputeti i S&D, Tonino Picula.
Ai beson se është arritur një “pikë kthese e paprecedentë” dhe rithekson se zgjidhja e vetme është normalizimi i marrëdhënieve përmes kompromisit.
“Për këtë na duhet një hetim dhe ndjekje e duhur, pa përshkallëzim të mëtejshëm dhe kthim të të dyja palëve në dialog me ndihmën e BE-së. Në këtë kontekst, Parlamenti Evropian duhet të bëjë thirrje edhe për vendosjen e masave ndëshkuese të BE-së ndaj Serbisë, të paktën ato të vendosura kundër Kosovës”, përfundoi Picula.
Në një debat që u fut në minutën e fundit në agjendën e seancës së fundit plenare të Parlamentit të BE-së, të martën e kaluar deputetët dënuan ashpër dhunën në Banjskë dhe i bënë thirrje Beogradit dhe Prishtinës që t’i kthehen dialogut nën kujdesin e BE-së për të normalizuar marrëdhëniet.
Deputetët presin që përgjegjësit e sulmeve të dalin para drejtësisë dhe kërkojnë që Serbia të bashkëpunojë pa kushte në hetimin e incidentit të 24 shtatorit ku mbetën të vrarë një polic i Kosovës dhe tre terroristë serbë. /Ballkani.info/







