Paraqitje mbresëlënëse e Durim Limajt në Sarajevë: E heqim taksën nëse na njeh Bosnja (VIDEO)
Ministria e Tregtisë së Jashtme dhe Marrëdhënieve Ekonomike e BeH organizoi sot një takim ndërmjet delegacionit të Bosnjë dhe Hercegovinës dhe Kosovës, ku u diskutua për vendimin e Prishtinës për taksat prej 100 për qind për mallrat nga BeH.
Të dy palët ranë dakord që me bisedimet e sotme të hapen dyer për dialog të mëtejshëm dhe se në një periudhë të shkurtër, institucionet kompetente duhet të gjejnë zgjidhjet më të mira për pengesat ekzistuese në lëvizjen e njerëzve, mallrave dhe shërbimeve.
Pjesë e takimit ishte edhe shefi i kabinetit të ministrit të Tregtisë dhe Industrisë, Durim Limaj.
Ai në një intervistë për televizionin Al Jazeera në Sarajevë, ka thënë se hapi më i afërt për heqjen e taksës ndaj mallrave boshnjake, është njohja e Kosovës nga Bosnja dhe Hercegovina, transmeton Ballkani.info.
Ai pati një paraqitje mbrëselënëse në këtë televizion kredibil rajonal. Me një anglishte perfekte, Limaj u është përgjigjur pyetjeve të gazetares në studio.
“Ne ju kemi përgjigjur ftesës së dytë të Bosnjës për takim në kuadër të marrëveshjes së CEFTA-s, edhe pse ftesa nuk na është bërë si Kosovë, por ftesa ishte si pjesë e CEFTA-s. Ky takim shënon të parin ndërmjet institucioneve të Republikës së Kosovës dhe atyre të Bosnjes dhe Hercegovinës”, ka thënë Limaj.
Ai ka shtuar se janë nevojitur 10 vjet që nga pavarësia e Kosovës që të organizohet një takim i tillë.
“Sot i kemi njoftuar institucionet e Bosnjes për masat që ka ndërmarrë Qeveria e Republikës së Kosovës. Ne ju kemi thënë kolegëve tanë nga Bosnja se jemi të gatshëm ta heqim taksën nëse pranohen kërkesat tona”, ka thënë ai. /Ballkani.info/
https://www.youtube.com/watch?v=uUrAn0NlSV4&fbclid=IwAR1dlGBDi2odPbM2eBheDrtZbuPTn0wCpTKXwV83T87WL4SGfY2HidslvpY&app=desktop
