Sipas informacioneve jozyrtare, që nga fillimi i luftës, më shumë se 13,000 fëmijë janë dërguar nga familjet ukrainase në Rusi.

U spekulua se po e bënte inteligjenca ruse dhe tani është shfaqur një video që e vërteton këtë. Gjegjësisht, kamerat e vëzhgimit regjistruan agjentë rusë të FSB-së dhe ushtarë të armatosur që enden nëpër një jetimore ukrainase – me qëllimin për të rrëmbyer fëmijët dhe për t’i dërguar në Moskë.

Pamjet tregojnë ushtarë të armatosur duke mbërritur në një jetimore krejtësisht të zbrazët, shkruan Daily Mail.

Kur panë se nuk kishte njeri në jetimore, filluan të gërmojnë nëpër kompjuterë me shpresën për të gjetur se ku ishin fshehur jetimët.

Nuk kishte asnjë sepse Vladimir Sakhaydak, drejtori i një jetimoreje pranë Khersonit, një zonë dikur nën kontrollin rus përpara se ushtria ukrainase të detyrohej të tërhiqej, fshehu 52 jetimë duke i dërguar fëmijët te familjet vendase që i pranuan pavarësisht rrezikut për t’u arrestuar ose e qëlluar.

“Ne pamë propagandistët rusë duke thënë se ata duhet t’i çojnë jetimët në shkollat ​​ushtarake, t’i indoktrinojnë dhe t’i lënë të luftojnë për Rusinë.” Ishte më e tmerrshmja, ndaj filluam t’i fshihnim fëmijët sepse e kuptuam se do t’i merrnin”, tha drejtoresha e jetimores.

Megjithatë, duke qenë se jetimorja është tani në territorin rus, trupat e Vladimir Putin sollën në jetimore 15 fëmijë të kapur në pjesë të tjera të Ukrainës përpara se t’i çonin në Rusi.

Një mësuese në jetimoren, Oksana, tha se fëmijët e tmerruar u futën në automjete të blinduara nga ushtarët me automatikë.

Natalia Kadyrova, e cila punon në një jetimore tjetër në Kherson, tha se ata madje rrëmbejnë fëmijë deri në moshën tre vjeçare.

Prokuroria e Ukrainës bëri të ditur se nga kjo jetimore në Kherson janë marrë 48 jetimë nga mosha tre deri në pesë vjeç dhe se kanë nisur hetimet.