Presidentja

Osmani, ambasadores kroate: Po bëjmë të pamundurën që të sigurojmë vaksinat antiCOVID-19

Presidentja e Kosovës, Vjosa Osmani ka pritur sot në takim ambasadoren kroate në Kosovë, Danijela Barishiq, e cila e ka uruar për detyrën, duke i dëshiruar sukses në angazhimin e mëtejmë.

“Ambasadorja Barishiq ka shfaqur gatishmërinë e shtetit kroat për thellimin e bashkëpunimit të të dy shteteve, duke potencuar se ai është i hershëm dhe daton që nga vitet e 90-ta.

Presidentja Osmani, ndërkaq ka falënderuar ambasadoren Barishiq për mbështetjen e Kroacisë ndaj Kosovës në periudha të ndryshme dhe poashtu ka shprehur gatishmërinë që bashkëpunimi ndërshtetëror të shtrihet në sfera të interesit të dyanshëm”, thuhet në njoftim.

Në këtë kontekst, Presidentja Osmani ka përmendur situatën me pandeminë, duke potencuar faktin se institucionet e Kosovës po e bëjnë ta pamundshmen që në një kohë sa më të afërt ta sigurojnë sasinë e nevojshme të vaksinave për të gjithë qytetarët.

Ajo ka theksuar se kjo kohë kërkon solidaritet global, ndaj ka shfaqur shpresën edhe në ndihmën e shteteve mike për sigurimin e vaksinave.