Ylli i PSG-së

Neymar mund të mungojë edhe në ndeshjen e kthimit ndaj Unitedit

Ylli brazilian i Paris Saint-Germainit, Neymar, pritet të mungojë në të dyja ndeshjet kundër Manchester Unitedit, në fazën e 1/8 të finales në Ligën e Kampionëve, për shkak të lëndimit të tij.

Lojtari 220 milionë eurosh i PSG-së mund të detyrohet ta bëjë operacion kyçin e këmbës së tij. Nëse një gjë e tillë ndodh, atëherë ai mund ta humbasë të gjithë pjesën e mbetur të këtij sezoni.

Problemi me këmbën e tij të djathtë, i ngjashëm me lëndimin që e mbajti jashtë fushës për tre muaj vitin e kaluar, pritet që t’ia pamundësojë 26-vjeçarit pjesëmarrjen në ndeshjet kundër Manchester Unitedit, më 12 shkurt në “Old Trafford” dhe më 6 mars në “Parc des Princes”.

“Do të jetë shumë e vështirë, kjo është e qartë. Është ende shumë herët të flasim për një datë të kthimit. Duhet ta presim javën e parë, që është shumë e rëndësishme, dhe reagimin e parë ndaj trajtimit”, ka thënë trajneri i PSG-së, Thomas Tuchel.

“Vetëm pasi të fillojë trajtimi dhe ta shohim mënyrën se si po reagon këmba e tij, atëherë mund të vendosim. Mirëpo, do të jetë shumë e vështirë që ai të luajë kundër Manchester Unitedit.

Megjithatë, përkundër mungesës së Neymarit, PSG-ja e vazhdoi ritmin e fitoreve duke i fituar tri pikët e radhës në Ligue 1 në ndeshjen kundër Rennais të dielën, të cilën parisienët e fituan me rezultat 4-1.