Napoli ka siguruar shërbimet e Rrahmanit, synon edhe Kumbullën

Drejtuesit e Napolit po punojnë me homologët e Veronës për një goditje të trefishtë në merkato.

Sipas “Corriere dello Sport”, ka pasur kontakte të vazhdueshme që nga dita e Krishtlindjes mes Cristiano Giuntolit, drejtorit sportiv te Napolit, dhe atij në Veronës, Tony D’Amico.

Tre janë emrat që i interesojnë Napolit: Amrabat, Rrahmani dhe Kumbulla.

Për dy të parët, palët e kanë gjetur gjuhën e përbashkët (mësohet se Rrahmani do të bëhet i Napolit për 12 milionë euro, por do të qëndrojë deri në fund të sezonit te Verona në formë huazimi) dhe formalizimi i i marrëveshjeve pritet të ndodhë në 10-ditëshin e dytë të muajit janar, pasi Napoli të zgjidhë dhe disa situata kontraktuale me lojtarët që ka në organikë.

Ndërsa për Kumbullën, edhe pse ka interes konkret, bisedimet do të vijojnë gjatë muajve në vazhdim dhe në varësi të ecurisë së 19-vjeçarit, do të bëhet edhe oferta e Napolit.

Futbollisti i Kombëtares Shqiptare do të monitorohet me kujdes nga Napoli, ndeshje pas ndeshjeje, deri në përfundim të sezonit.