Ministri i Drejtësisë
Ministri danez: Në Kosovë më thanë se marrëveshja për burgjet votohet së shpejti
Është bllokuar në parlament, por tani plani i qeverisë daneze për të marrë me qira 300 burgje në Kosovë, së shpejti mund të bëjë një hap tjetër më tej.
Kjo është përshtypja e Ministrit të Drejtësisë të këtij vendi Peter Hummelgaard, teksa kthehej në shtëpi nga Kosova.
“Kam pasur takime konkrete me qeverinë dhe partitë kryesore opozitare dhe mesazhi është se ata e duan këtë partneritet”, tha ai, raporton gazeta daneze “kristeligt-dagblad.dk”, ka transmetuar Klankosova.
Sipas këtij mediumi, mosmarrëveshjet e brendshme në parlamentin e Kosovës kanë bërë që opozita në vend ka bllokuar miratimin e të gjitha marrëveshjeve ndërkombëtare që kërkojnë zgjedhje të reja.
Kjo mosmarrëveshje është zbutur, prandaj, shkruan kjo gazetë, Hummelgaard është sërish optimist.
Për qeverinë daneze, plani është pjesë e përpjekjes për të krijuar hapësirë në burgjet daneze, të cilat janë nën presion e mungesë së kapaciteteve dhe personelit.
Prandaj kriminelët e deportuar duhet të transferohen diku tjetër para se të nisen për në vendin e tyre, dhe këtu plani është në burgun e qytetit të Gjilanit.
“Ekziston një udhërrëfyes i qartë dhe i plotë. E vetmja gjë që na duhet është që parlamenti i Kosovës ta ratifikojë traktatin”, tha ai.
Gjatë vizitës së tij në Prishtinë, ministrit danez nuk i është dhënë një afat kohor për miratimin e marrëveshjes nga Kosova, thotë gazeta daneze.
Por edhe pse marrëveshja ka qenë në gatishmëri prej disa vitesh, ministri Hummelgaard pret që së shpejti të bëhet realitet.
“Gjithçka që mund të them është se thonë se së shpejti do të votohet në parlament”, u shpreh ai.
Sipas disa mediave kosovare, ministrja e Drejtësisë së Kosovës, Albulena Haxhiu, e prezantoi projektligjin të enjten. Në një fjalim, ajo tha se dëshiron që ratifikimi të votohet pas vizitës së Peter Hummelgaard.
Për të miratuar marrëveshjet ndërkombëtare në Kosovë, kërkohet një shumicë prej dy të tretash.
“kristeligt-dagblad.dk” thotë se për këtë arsye qeveria ka nevojë për mbështetjen e partive opozitare dhe kjo është baza e takimeve të ministrit me to.
Peter Hummelgaard thekson se kushtet e burgut supozohet të jenë në përputhje me standardet daneze.
“Sapo parlamenti të ketë ratifikuar traktatin, ne do të fillojmë rindërtimin e ambienteve të burgut për të përmbushur standardet daneze”, u shpreh ministri danez i Drejtësisë, Hummelgaard.
BONUS VIDEO: “200 mijë qytetarë ta kanë lëshu Kosovën” – “Po manipuloni”, përplasje mes Zemajt dhe Muratit
