Mini-Shengeni Ballkanik, Sali Berisha: Edi Rama po përdoret nga Vuçiq për të kapur autoritetet e Kosovës

Deputeti i PD-së në Shqipëri, Sali Berisha ka thënë se iniciativa e Minishengenit e filluar nga Rama, Vuçiqi e Zaev është destabilizuese për Ballkanin.

Berisha në një videolidhje në “Debat Plus” ka thënë se kjo aleancë trilaterale nuk i shërben paqes në Ballkan, por nxit fantazmat e vjetra dhe rivalitete të panevojshme.

“Edi Rama po përdoret nga Aleksandar Vuçiq për të kapur autoritetet e Kosovës me të cilat [Vuçiq] nuk po mund të merret vesh”, tha lideri historik i PD-së.

Ish-kryeministri i Shqipërisë thotë se në Uashington Kosova dhe Serbia u paraqiten si të barabarta derisa sipas tij në Minishengen këto shtete nuk po paraqiten të barabarta.

Berisha ka thënë se nuk do të ishte kundër Minishengenit nëse ajo të do ishte e barabartë për të gjitha shtetet pjesëmarrëse.

“Nëse nuk është Mali i Zi, Bosnja, Kosova, me Minishengenin po krijohet një aleancë politike trilaterale karshi vendeve tjera e më së shumti aleancë kundër Kosovës. Vuçiqi nuk e pranon Kosovën si të barabartë mes të barabartëve”, tha ai, përcjell Telegrafi.

Lideri historik i PD-së në Shqipëri thotë se Ballkani e ka provuar hegjemoninë e Serbisë.

“Kurti nuk ka kërkuar asgjë më shumë se barazi mes shteteve”, tha ndër të tjera Sali Berisha.