Messi i kërkon falje PSG-së për udhëtimin në Arabinë Saudite: Mendova se kishim një ditë pushim
Lionel Messi ka kërkuar falje për udhëtimin e tij në Arabinë Saudite që rezultoi me suspendimin e tij nga Paris Saint-Germaini.
Ylli argjentinas kishte udhëtuar drejt Lindjes së Mesme pa lejen e klubit, me ç’rast ai u suspendua për dy javë nga klubi parisien.
Messi, përmes një video të publikuar në “Instagram”, i ka kërkuar falje PSG-së, teksa ka thënë se ka menduar që ekipi ka një ditë pushim.
“Mendova se do të kishim një ditë pushimi pas ndeshjes si gjithmonë. E kisha organizuar këtë udhëtim dhe nuk mund ta anuloja. E kisha anuluar më parë. I kërkoj falje bashkëlojtarëve të mi dhe jam duke pritur se çfarë dëshiron të bëjë klubi me mua”, është shprehur ai.
Përveç se do t’i mungojë PSG-së në dy ndeshje, 35-vjeçari nuk do të mund as të stërvitet për dy javë, si dhe nuk do të paguhet për këtë periudhë kohore.
