Liverpooli e fiton betejën me Atleticon, Milani nuk është ende për Champions
Liverpooli e ka fituar betejën me Atletico Madridin, duke triumfuar 3-2 në “Wanda Metropolitano”. Në ndeshjen tjetër, Milani është mposhtur edhe nga Porto, tri ndeshje, tri humbje – Kuqezinjtë nuk janë të zakonshmit në Champions League.
Atletico dhe Liverpooli ka dhuruar spektakël në “Wanda Metropolitano”, sfidë që u mbyll me fitoren e mysafirëve 2-3.
Salah në minutën e 8’ dhe Keita në minutën e 13’ shënuan dy gola të shpejtë për 0-2 që i befasuan vendasit.
Por, Atletico reagoi dhe me dy gola të Antoine Griezmann, në minutat 20 dhe 34, barazuan gjithçka.
Në pjesën e dytë, në minutën e 52’, Griezmann bëri një ndërhyrje të rrezikshme, dhe u përjashtua me të kuq.
Kjo e ndryshoi takimin, pasi në minutën e 76’, mysafirët fituan një penallti të cilën Salah e shndërroi në gol, për t’ia dhuruar tri pikë Liverpoolit.
Porto 1-0 Milan
Ky Milan nuk është për Champions League.
Të besuarit e Stefano Piolit e kanë pësuar edhe humbjen e tretë në po kaq ndeshje në Ligën e Kampionëve këtë edicion.
Milani u mposht 1-0 nga Porto me golin e Diaz në minutën e 67’ dhe kështu Milani mbetet i fundit në renditje, në rrezik edhe për vendin e tretë, që dërgon në Europa League.
