Lidhja Demokratike e Kosovës (LDK) ka reaguar ashpër pas vendimit të kandidatit të saj për kryetar të Komunës së Vushtrrisë, Xhafer Tahiri, për të bërë koalicion me Lëvizjen Vetëvendosje në balotazhin e 9 nëntorit, duke e cilësuar këtë veprim si individual, të paautorizuar dhe në kundërshtim me procedurat statutare të partisë.

Në një komunikatë për media, LDK-ja ka sqaruar se nuk ka dhënë dhe nuk do të japë autorizim për ndonjë koalicion lokal pa ndjekur procedurat e saj të brendshme.

“Veprimet e kandidatit tonë në Vushtrri për të lidhur koalicion me një parti tjetër, janë veprime individuale, të papranueshme dhe në kundërshtim me procedurat statutare të Lidhjes Demokratike të Kosovës,” thuhet në reagim.