Lamtumira me Argjentinën, ironia: “Higuain duhet të luante për Francën…!”
Higuain-Argjentina, divorci tashmë është përfundimtar. Pipita do të largohet nga “Seleccion” pas 75 ndeshjesh dhe 31 gola.
Një mesatare e rëndësishme, që gjithsesi nuk mjaftoi për të bindur tifozët “Albiceleste”. Ndërkohë që konsumohet lamtumira e zhurmshme, ka nga ata që mendojnë për të kaluarën.
Bëhet fjalë për ish-trajnerin e përfaqësueses së Francës, Raymond Domenech, që ka komentuar me ironi lajmin.
“Duhej thjeshtë të ishte kthyer në shtëpi! E them shpesh duke qeshur, edhe pse nuk kam patur kurrë mundësinë që të komunikoj direkt me atë. Pyes akoma veten nëse ai e mendoi ndonjëherë atë mundësi”, deklaroi Domenech.
Rasti të cilit i referohet Domenech daton në 2006, kur Gonzalo luante te Real Madrid: Argjentina apo Franca? Pikërisht, sepse Pipita ka patur gjithmonë pasaportën argjentinase, por ka lindur në Brest të Francës dhe do të mund të përfaqësonte “Gjelat”.
Asaj kohe Higuain refuzoi ftesën e mbërritur nga përfaqësuesja franceze dhe zgjodhi “Seleccion”. Një vendim që tashmë është vënë sërish në diskutim nga ish-trajneri i Francës.
