Kryeministri
Kurti shfaqet te Çadra e Iftarit te Pallati i Rinisë, Besnik Bislimi e ambasadori turk i bëjnë shoqëri
Kryeministri Albin Kurti ishte i ftuar sonte për të bërë iftar me përfaqësuesit e Odës Tregtare Kosovaro-Turke dhe qytetarë të pranishëm në Çadrën e Iftarit te Pallati i Rinisë.
Ai tha se është i nderuar që mori pjesë në këtë iftar, duke kërkuar që të përqendrohet tek ana shpirtërore e tek solidariteti me të tjerët.
“Me këtë rast ju dëshiroj agjërim të lehtë në muajin e shenjtë të Ramazanit dhe një iftar të shijshëm sonte duke përkujtuar që ky muaj na thotë që të përqendrohemi tek ana jona shpirtërore, tek solidariteti me të tjerët, te mirëkuptimi me të gjithë, tek bashkëpunimi i shëndetshëm dhe tek vlerat e besimit e të shpresës”, u shpreh ai.
Kurti në fund pati edhe në porosi për agjëruesit me ndërrimin e orës nesër.
“Ky është gjithashtu edhe iftari i fundit me orën dimërore sepse sonte pas mesnatës ndërrohet ora dhe nesër iftari, mos e ngatërroni, nuk është në 18:08 por në 19:08”.
Fjala e plotë e kryeministrit Kurti:
Motra e vëllezër,
Zonja dhe zotërinj,
Unë jam shumë i nderuar dhe i gëzuar që ky iftar na bëri bashkë të gjithë.
Me këtë rast ju dëshiroj agjërim të lehtë në muajin e shenjtë të Ramazanit dhe një iftar të shijshëm sonte duke përkujtuar që ky muaj na thotë që të përqendrohemi tek ana jona shpirtërore, tek solidariteti me të tjerët, te mirëkuptimi me të gjithë, tek bashkëpunimi i shëndetshëm dhe tek vlerat e besimit e të shpresës.
Me ketë rast kisha dashur që në veçanti të përshëndes shkëlqesinë e tij ambasadorin e Turqisë në Kosovë, Sabri Tunç Angili, Kryetarin e Odës Tregtare Kosovaro-Turke, Abdurrahman Balkiz, anëtarin e Odës dhe gjithashtu sponsorin e këtij iftari z. Güriş, zëvendëskryeministrin në Qeverinë e Republikës së Kosovës, Besnik Bislimi dhe natyrisht që e lash si ëmbëlsirën për fund, nga Vakfi Ejup Sultan i Turqisë, organizator i çadrës së iftarit prej vitit në vit sa herë që bëhemi bashkë këtu te Pallati i Rinisë, İskender Janova.
Ky është gjithashtu edhe iftari i fundit me orën dimërore sepse sonte pas mesnatës ndërrohet ora dhe nesër iftari, mos e ngatërroni, nuk është në 18:08 por në 19:08.
Iftar të këndshëm dhe Zoti ua bëftë kabull të gjithëve.
