Kurti pret në zyrë KB Pejën, kampionin e Kosovës në basketboll
Kryeministri i Kosovës, Albin Kurti ka pritur në takim gjatë të enjtes kampionen e Superligës së Kosovës në basketboll, Pejën.
Peja është shpallur kampione e Kosovës për edicionin 2022/23 në Superligën e Kosovës në basketboll, pasi ka mposhtur Trepçën me rezultat të përgjithshëm 3:2.
Disa ditë pasi fituan titullin kampion, drejtuesit e klubit pejan dhe disa nga lojtarët kanë vendosur ta takojnë kryeministrin e Kosovës, Albin Kurti, në zyrën e tij në Qeveri.
Takimi ishte shumë i këndshëm për të dyja palët, teksa nuk munguan as batutat nga ana e kryeministrit, gjatë fotografimit me disa nga lojtarët e Pejës.
I tillë ishte momenti me basketbollistin Alban Veseli, ku pasi e bënë një fotografi ‘zyrtare’, kryeministri i kërkoi të ‘çlirohen’ pasi iu duk sikurse një fotografi me emisarin e dialogut, Miroslav Lajçak.
Ky moment shkaktoi shumë të qeshura mes të pranishmeve.
