Kombëtarja e Kosovës U21 e ka zhvilluar mbrëmë stërvitjen e saj në stadiumin “KCOM” në Hull City, aty, ku sonte, në orën 20:45, do të luajë ndeshjen kualifikuese kundër Anglisë U21 në kuadër të kualifikimeve për Euro 2021.

Atmosfera në kampin e drejtuar nga Rafet Prekazi është shumë e mirë dhe të gjithë futbollistët janë të gatshëm për lojë.

Përkundër faktit se përballë do të kenë një kundërshtar shumë cilësor, Dardanët e rinj e presin me entuziazëm këtë duel dhe me vetëbesim se mund të nxjerrin rezultat pozitiv.

Stërvitja e djeshme ka qenë me intensitet më të vogël, por i ka shërbyer futbollistëve për t’u ambientuar me fushën, derisa përzgjedhësi Prekazi ka dhënë instruksionet e fundit për lojën e cila zhvillohet sot.

Kujtojmë që në grupin 3, Kosova është lidere me gjashtë pikë me dy ndeshjeve të zhvilluara, kurse ‘Tre Luanët’ kanë tre pikë me një ndeshje të luajtur.

loading…