Konkretizohet “pista” që e dërgon Xhakën te Hertha Berlini

Hertha Berlini i ka nisur bisedimet me Granit Xhakën, për kthimin e mundshëm të mesfushorit shqiptar të Arsenalit në Bundesligë.

Sipas RMC Sport, Hertha dështoi ta blejë mesfushorin e Lyonit, Lucas Tousart pasi ky i fundit e kishte refuzuar klubin gjerman, dhe tani ka vendosur ta transferojë Xhakën e padëshiruar në Arsenal.

Hertha kishte bërë ofertë në vlerë 20 milionë euro për Tousart, i cila ishte refuzuar menjëherë.

Klubi gjerman ka hequr dorë nga francezi dhe tani vëmendjen e ka kthyer kah mesfushori shqiptar i Kombëtares së Zvicrës dhe Arsenalit, Granit Xhaka.

Trajneri i ri i Herthas, Jurgen Klinsmann, është i vendosur ta sjellë Xhakën në skuadër në janar.

Largimi i Xhakës nga gjiganti i Premierligës është dukur më i mundshëm që prej kacafytjes së tij me tifozët e Arsenalit në tetor dhe humbjes së shiritit të kapitenit si pasojë.

Xhaka e njeh mirë Bundesligën gjermane, pasi ka qenë pjesë e Borussia Monchengladbach para se t’i bashkohej Arsenalit.