KFOR-i: Po e vazhdojmë misionin – ushtarët që infektohen, trajtohen në hapësirat tona

KFOR-i ka lëshuar një komunikatë që ndërlidhjet me gjendjen e krijuar në Kosovë nga pandemia e COVID-19.

Me anë të një komunikate për media, KFOR ka thënë se po e vazhdon misionin e saj, ashtu siç është mandatuar nga Kombet e Bashkuara, shkruan lajmi.net.

“Në përgjigje ndaj pandemisë globale të virusit Corona, Forca e Kosovës e udhëhequr nga NATO po vazhdon në mënyrë të rregullt misionin e saj të mandatuar nga Kombet e Bashkuara për të siguruar një mjedis të qetë dhe të sigurt si dhe liri të lëvizjes për të gjitha komunitetet në Kosovë, duke ndërmarrë të gjitha masat e nevojshme për të mbrojtur ushtarët e saj, partnerët dhe popullsinë e Kosovës”, thuhet në njoftim.

KFOR tutje thotë se ka kryer patrullime e aktivitete ndërlidhëse, si dhe kanë përkrahur edhe komunat.

“Në javët e fundit, njësitë e KFOR-it kanë kryer patrullime, aktivitete ndërlidhëse dhe monitoruese si dhe kanë mbështetur institucionet dhe komunitetet lokale, përmes dhurimit të pajisjeve mbrojtëse personale dhe dërgimit të ushqimit dhe rrobave për familjet në nevojë, në koordinim me Kryqin e Kuq në Kosovë. Si reagues i parë i sigurisë, KFOR-i i ofron mbrojtje Manastirit të Deçanit, vend i rëndësisë së madhe fetare ortodokse dhe kulturore”, thuhet tutje në njoftim.

KFOR thotë se mbetet vigjilent dhe vazhdon të monitorojë dhe vlerësojë situatën në koordinim të ngushtë me Institucionet në Kosovë dhe Ministrinë e Shëndetësisë në veçanti, si dhe me Organizatat e Sigurisë dhe Komunitetin Ndërkombëtar.

“Kapacitetet e KFOR-it në kryerjen e operacioneve për të kontribuar në sigurinë e të gjitha komuniteteve në Kosovë nuk janë dobësuar. Ne mbetemi absolutisht të përkushtuar për të ruajtur forcen tone parandaluese dhe te mbrojtjes, ndërsa ndihmojmë në kufizimin e përhapjes së virusit. Forcat tona mbeten të gatshme dhe puna jonë thelbësore vazhdon, nën mandatin e dhënë nga Rezoluta 1244 e Këshillit të Sigurimit të Kombeve të Bashkuara te vitit 1999 “, deklaroi gjeneralmajor Michele Risi, Komandant i KFOR-it.

Në aspektin e parandalimit, që nga fillimi i pandemisë COVID-19, KFOR-i ka zbatuar masa të kujdesshme bazuar në rekomandimet e Organizatës Botërore të Shëndetit, me qëllim te lehtesimit te rreziqeve për personelin e saj dhe për të gjitha komunitetet e Kosovës.

“Masat e tilla zbatohen në të gjitha bazat dhe objektet e KFOR-it dhe përfshijnë masa të rrepta higjienike, ekzaminim dhe kontrolle të të gjithë personelit ushtarak, kufizime të përkohshme në aktivitete jo thelbësore. Kontraktuesit lokalë të Kosovës që tregojnë shenja ose kanë një histori ekspozimi nuk lejohen te hyjne në baza”, thuhet në deklaratë.

Në reagim përmendet edhe fakti se dy punëtorë civil në “Bondsteel” kanë humbur jetën, nga ku qartësohet se të gjithë ushtarët e KFOR-it që kanë shenja të infektimit, vendosen në karantinë.

“Ashtu si në pjesën tjetër të shoqërisë, disa nga pjesetaret e personelit tane janë testuar pozitiv, dhe për fat të keq dy punëtorë civilë humbën jetën. Cilido ushtar i KFOR-it që tregon shenja të infektimit nga COVID-19 apo ka pasur kontakte me dikë të infektuar, vendoset në karantinë. Nëse ushtarët e KFOR infektohen, ata trajtohen ne hapesirat mjekësore në bazat e KFOR-it dhe futen në karantinë për të zvogëluar ekspozimin, përpara se të evakuohen”, thuhet në komunikatë.