Hazard nuk do të jetë i gatshëm as për ndeshjet e Superkupës së Spanjës

Sezoni i parë te Real Madridi po kthehet në një makth për Eden Hazard.

Pas dëmtimit që pësoi që në fillimin e kampionatit dhe rikthimit pa lënë shumë shenjë në fushën e lojës, Hazard u dëmtua sërish në sfidën e muajit nëntor ndaj PSG-së në Champions dhe vazhdon të qëndrojë jashtë fushave të lojës prej shumë ditësh duke humbur edhe El Clasicon e 18 dhjetorit ndaj Barcelonës.

Rikthimi i tij pritej në fillim të vitit të ri 2020, por duke iu referuar asaj çfarë shkruan MundoDeportivo, Hazard do të humbasë edhe Final Four e Superkupës që do të zhvillohet në Arabinë Saudite nga data 8 deri në 12 janar dhe në të cilën do të marrin pjesë Barcelona, Atletico Madrid, Valencia dhe pikërisht Real Madridi që në gjysmëfinale do të sfidojë Los Che.