Haradinaj i kundëpërgjigjet ashpër Borrellit: Qenke i cekët, nuk pranojmë trajtime nën nivelin e shtetësisë

Ish-kryeministri, Ramush Haradinaj, me anë të një shkrimi të gjatë në Facebook ka reaguar ndaj deklaratës së Kryediplomatit të BE’së, Josep Borrell Fuentes, i cili tha që Kosova nuk mund të jetë shtet përderisa nuk është njohur nga shtete të mëdha sikur India, Kina dhe Rusia.

Haradinaj ka kujtuar planet për shkëmbime të territoreve të cilat kishin bekimin e paraardhëses së Borrell, Federica Mogherini, transmeton Gazeta Express

“U deshën dy vite sensibilizim ndërkombëtar dhe rezistencë aktive për mospranim të devijimit të dialogut të Mogherinit – nga ai i normalizimit të marrëdhënieve, në atë të korrigjimit e shkëmbimit të kufijve e territorit”, ka shkruar Haradinaj.

“Kur kërkova rol aktiv amerikan në dialog në fund të vitit 2017, atëkohë sapo kisha marrë detyrën e Kryeministrit, zonja Mogherini dhe ekipi i saj u alarmuan dhe anuluan konferencën e përbashkët të paraparë për shtyp. Ngjashëm ndodhi në fund të vitit 2018, kur ne asokohe veç kishim ndërmarrë masat parandaluese të nevojshme për të ndaluar avansimin e ndarjes së Kosovës.”

Andaj Haradinaj është indinjuar nga deklarata e sotme e Josep Borrell.

“Sot, kur dëgjojmë z.Borrell, i nominuar për të zëvendësuar znj.Mogherini, duke deklaruar gjatë seancës dëgjimore para Komisionit për Politikë të Jashtme, se Kosova asnjëherë nuk do jetë shtet përderisa nuk njihet nga Kina, Rusia, e India, ndjej keqardhje për cektësinë e njohurive të tij për rajonin tonë, ndërsa pretendon të udhëheqë politikën e jashtme të BE-së”, ka thënë Haradinaj.

Ai ka përmendur parimin themelor, se njohja sipas të drejtës ndërkombëtare, nuk e bën apo zhbën shtetësinë. Haradinaj thotë se njohja është akt politik, dhe nuk e përcakton funksionalitetin juridik e politik të shtetit.

“Kosova është me fat që e ka bekimin e shumicës kritike të shteteve demokratike perëndimore, që vazhdojnë të na përkrahin në secilën fushë. Deklaratat e tilla, sidomos para konfirmimit të pozitave me ndikim në institucionet evropiane, provojnë qartë nivelin e ultë të kredibilitetit dhe njohjes sipërfaqësore të rrethanave në Ballkan nga z.Borrell”, ka thënë kryetari i AAK’së.

“Kosova pret seriozitet dhe respekt të ndërsjellë nga përfaqësuesit e Komisionit Evropian, sidomos tani që udhëhiqet nga Gjermania. Besojmë fuqishëm se degradimet, shkarjet, dhe ofendimet e tilla, nuk do të lejohen më nga institucionet e BE-së. Kosova që nga viti 2017, nuk pranon trajtime nën nivelin e shtetësisë dhe sovranitetit të plotë të saj”

Ky është statusi i plotë i tij: