Një pjesë e futbollistëve të Kombëtares së Kosovës i kanë nisur të martën pasdite përgatitjet për dy ndeshjet kualifikuese të qershorit për Kampionatin Evropian 2020, përfshirë prurjen e re, Florent Hadërgjonajn.

Edhe pse sapo është bërë pjesë e ekipit të Kosovës, Florent Hadërgjonaj dhe Milot Rashica e shfaqën lidhjen e tyre të mirë në fushë qysh në stërvitjet e para.

Gjatë seancës stërvitore që u mbajt dje në “Fadil Vokrri”, Hadërgjonaj e harkoi një top brenda zonës së 16-metërshit dhe Rashica e dëshmoi veten duke e shënuar atë në stilin “vollej”.

https://tiger.cdnja.co/v/3k/3kWP.mp4?secure=zYSJqM5zE_pvANFepQ3cEA&expires=1559133000

Pesë prej njëzetepesë futbollistëve të ftuar nga trajneri Bernard Challandes për dy ndeshjet kualifikuese për Euro 2020 kundër Malit të Zi dhe Bullgarisë zbritën dje në fushën e gjelbër të stadiumit Fadil Vokrri në Prishtinë.

Kosova do të udhëtojë drejt Podgoricës më 7 qershor për t’u përballur me Malin e Zi, para se ta vizitojë Sofjen për t’u ndeshur me Bullgarinë në dy ndeshjet e Grupit A kualifikues, ku bëjnë pjesë edhe Anglia dhe Republika e Çekisë.

Samir Ujkani, Visar Bekaj, Atdhe Nuhiu, Milot Rashica dhe Florent Hadërgjonaj, të cilët kanë mbërritur në Kosovë më herët se të tjerët, i kanë filluar nën përkujdesjen e trajnerit të përgatitjes fizike, Thomas Richard dhe trajnerit të portierëve, Ahmet Beselica, njofton Federata e Futbollit e Kosovës (FFK).

Ata u stërviten kryesisht në aspektin fizik, sipas FFK-së.

Ata do të vazhdojnë stërvitjet edhe në ditët në vijim me lojtarë tjerë që arrijnë në ndërkohë, por stërvitjet e kompletuara do të fillojnë më 2 qershor, pasi ekipi kombëtar të jetë kompletuar.