Gjermania ka fituar thellë kundër Lihtenshtajnit. Të enjten në mbrëmje në kuadër të kualifikimeve të Botërorit “Katari 2022”, gjermanët fituan me rezultatin e thellë, 9:0.
Në “Volkswagen Arena” të Wolfsburgut, vendësit shënuan katër herë në pjesën e parë dhe pesë herë në pjesën e dytë.
Jens Hofer u ndëshkua me karton të kuq në minutën e nëntë kurse Ilkay Gundogan e hapi serinë e golave në minutën e 11-të nga penalltia. Pas 20 minutave lojë, rezultati u dyfishua pas autogolit të Daniel Kaufmann. Leroy Sane dy minuta më pas e trefishoi epërsinë pas asistimit të Leon Goretzkas, kurse Marco Reus në minutën e 23-të shënoi për 4:0, rezultat me të cilin u mbyll pjesa e parë.
Katër minuta pas pushimit, Sane e shënoi edhe golin e dytë personal në ndeshje. Për 6:0 u përkujdes Thomas Muller në minutën e 76-të.
23-vjeçari i mesfushës, Ridle Baku shënoi në minutën e 80-të për 7:0, ndërsa Muller golin e dytë personal në ndeshje dhe të tetin për Gjermaninë e realizoi në minutën e 86-të. Autugoli i Max Goppelit e mbylli ballafaqimin me rezultatin 9:0 në të mirë të gjermanëve.
Gjermanët janë kualifikuar në Botërorin që zhvillohet në Katar vitin tjetër.
Në nëntë ndeshje të zhvilluara kanë 24 pikë në Grupin J. Lihtenshtajni është në pozitën e fundit me një pikë, me dy gola të shënuar e 32 të pranuar.







