Feronikeli me përkrahje të madhe të tifozëve

Feronikeli mund të shkruajë sonte historinë duke u bërë klubi i parë kosovar që kualifikohet në rrethin e dytë kualifikues të Ligës së Kampionëve. Për ta ndihmuar klubin drenicas ta arrijë këtë sukses, shumë tifozë kanë ardhur në mbështetje në stadium.

Rreth gjashtë mijë tifozë janë të pranishëm në tribunat e stadiumin “Fadil Vokrri” në Prishtinë, për ta përcjellë përballjen mes Feronikelit dhe TNS, në kuadër të rrehit të parë kualifikues në Ligën e Kampionëve.

Tre mijë bileta ishin dhënë falas nga Feronikeli, ndërsa bileta falas ishin ndarë edhe për invalidët e luftës dhe pjesëtarët e SOS Fshatrave të Kosovës.

Edhe pse stadiumi ende nuk është mbushur, tifozë po hyjnë brenda vazhdimisht, pasi që janë ende minutat e parë të lojës.

Klubi nga Drenasi mund të kalojë në rundin e dytë kualifikues me çfarëdo fitore dhe madje edhe me barazim pa gola dhe 1:1. Barazimi 2:2 e çon ndeshjen në kohën shtesë dhe penallti potencialisht, ndërsa çfarëdo humbje apo çfarëdo barazimi 3:3 dhe më lart e eliminon Niklin.

Fitues i dyfishtë në Kosovë, i ligës dhe kupës, Nikli mund ta shkruajë historinë nëse e kalon këtë rund, duke u bërë klubi i parë kosovar që arrin kaq larg në kualifikime për Ligën e Kampionëve, garën më prestigjioze evropiane për klube.

Në anën tjetër, kjo është e 13-ta herë për TNS që garon në kualifikohet për Ligën e Kampionëve. Më së shumti klubi uellsian ka arritur deri në rundin e tretë kualifikues, ndërsa këtë herë Feronikeli shpreson t’ia ndalë rrugëtimin qysh në rundin e parë.